Słuchaj Radia Kaszebe
    Jinfòrmacëje

    Opublikowano 11 kwietnia, 2017 | przez Adóm Hébel

    Klëka 2017.04.11 (csb)

    • Pòlitik z Kalifòrnie wizytowôł Pùck – szëkôł za swòjima kòrzeniama.
    • Sprzedôż domôcëch produktów je corôzka wikszô – dokazã je kermasz „I Tradycje Wielkanocne w Kościerzynie”.
    • Nabór kapelów òdemkłi – do czwiôrtégò Przezérkù Wieslnëch Karnów w Òstrzëcach.

     


    WTÓRK, 11 łżëkwiata

    • Pòlitik z Kalifòrnie wizytowôł Pùck – szukôł tam za swòjima kòrzeniama.

    Jeffrey Prang to je asesór grafstwa Los Angeles, rëchli miôł fąkcjã bùrméstra Zôpadnégò Hollywood. W swòji genealogiczny bómie mô Òkòniów i Skwierczów. Cepło przëjãłë gò wëszëznë Pùcka i rôczą krewnëch amerikańsczégò ùrzãdnika do kòńtaktu. Wicy ò tim rzecze Adóm Hébel.

    • Jak zrobic zakwas do swiątecznégò żura, prażnicã z jajów òd sztrusa czë wòrztã z lasfòra? Tegò sã mòglë doznac ùczãstnicë I Kaszëbsczich Jastrowëch Tradicjów w Kòscérznie.

    Kermasz z pòkôzkama tradicje i rãcznëch wërobinów zòrganizowôł kòscérsczi Browar i stowôra Kościerska Chata. Na stojiszczach to mógł sprawic rãczno robioné pisanczi, czipczi i palmë a téż jastrowé pùlwerkùchë i mazurczi. – Frekwencjô je wikszô niżlë më sã spòdzéwelë – gôdô òrganizatórka Halina Rogińskô. Na kùńc kermaszu wëstôwcowie zòrganizowelë licytacjã wëbrónëch produktów z jaczi wzątk pùdze na charitatiwné cele.

    • Nabór kapelów òdemkłi – do czwiôrtégò Przezérkù Wieselnëhc Karnów w Òstrzëcach „Wieselné Granié”.

    To kòżdorocznô rozegracjô jakô wëzdrzi jak mùzyka na wieselim, na jaczim graje pôrã karnów. Przezérk dôwô szansã na zaprezeńtowanié kapelóm jaczé grają na wiesołach i biesadach jak rozmieją rozgrzôc do tuńca. Dokazë w jich wëkònanim òceniwają w sms-owim welowanim słëchińcowie Radia Kaszëbë. Wieselné Granié mdze w Òstrzëcach w pòłowie lëpińca. – Nabór më zaczinómë rëchli cobë dac karnóm mòżlëwòtã òbsztëlowaniô terminu – gôdô direchtór Gminowégò Òstrzódka Kùlturë w Somòninie Marión Kòwalewsczi. W Òstrzëcach to mdze mògło wëstąpic kòle 9 karnów, wëbrónëch ze zgłoszeniów przez òrganizatora. Kôrta ùdzélu i regùlamin są na jinternetowi stronie Gminowégò Òsrzódka Kùlturë w Somòninie.

    Radio Kaszëbë, 11:55

    Udostępnij: Share on Facebook0Share on Google+0Print this pageEmail this to someone


    O zespole

    Redachtór aùdicjów Na Widnikù Kaszëbë i Dobri Dzéń Kaszëbë. Pùblikùje w Bôłtëcczim Dzénnikù, Pòmeranie i Kaszëbsczi Zemie. Prowadzy blog hebel.kaszubia.com. Kòmédiańt, nôleżnik kabaretu Kùńda i czerownik teatru Zymk.







    Back to Top ↑