Słuchaj Radia Kaszebe
    Jinfòrmacëje

    Opublikowano 3 października, 2017 | przez Adóm Hébel

    Klëka 2017.10.03 (csb)

    • Mają przedłëżony nabór na roczny Kùrs Lëdowégò Tuńca òrganizowóny przez wejrowsczé mùzeùm i gduńska Mùzyczną Akademiã.
    • W Chmielnie pòwstôwô młodzëznowé karno – chãtny do mùzykòwaniô i spiéwaniô mògą ju sã zgłosziwac.
    • Na 16-té Kaszëbsczé Diktańdo to sã mòże zapisywac do 25 rujana.

    WTÓRK, 3 rujana

    • To sã jesz mòże zgłaszac na roczny Kùrs Lëdowégò Tuńca – òrganizowóny przez wejrowsczé mùzeùm i gduńską Mùzyczną Akademiã.

    Nabór je przedłëżony ò 11 dniów, z kùńca séwnika na 11 rujana. Kùrs je czerowóny do szkólnëch, jinsztruktorów tuńca i wszëtczich zajinteresowónëch kaszëbską kùlturą. Òbjimô 9 comiesãcznëch zjôzdów, to je wëkładów we Wejrowie, prakticznëch zajmów we Gduńskù i terenowëch warkòwniów z fòlklornyma karnama. Zajmë pòprowadzą doswiôdczony tuńcerze, mùzykńcë i regionaliscë. Zachãcony zwënégą pilotażowi edicje më chcemë dali i dłëżi wespółrobic – klarëje prorektór gduńsczi Mùzyczny Akademie prof. Mark Rocławsczi. Dodôwô Tomôsz Fópka, direchtór Mùzeùm Kaszëbskò-Pòmòrsczi Pismieniznë i Mùzyczi we Wejrowie. Placówka przëjimô zapisë na II Kùrs Lëdowégò Tuńca do 11 rujana.

    • Za to dlô tëch co kòchają mùzykòwanié abò spiéw z gminë Chmielno – je leżnosc wstąpic do młodzëznowégò karna.

    Grëpa pòwstôwô przë Gminowim Òstrzódkù Kùlturë, Spòrtu i Rekreacje. Cobë tam dołączëc to mùszi miec mni jak 25 lat. Próbë z jinsztruktorã mdą 2 razë w tizeniu. – Na dzys to nie je wiedzec jaczi bądze profil karna, to sã òkôże dopiérze pò nabiérze – gôdô direchtórka chmieleńsczégò GOK-ù Édita Klôsa. Zajinteresowónëch jô òdsélóm na jinternetową stronã gminë Chmielno.

    • Na 16-té Kaszëbsczé Diktańdo to sã mòże zapisywac – do 25 rujana.

    Ùczãstnicë sã zmierzą 4 smùtana, kònkùrs mdze w Bòjanie w gminie Szëmôłd. Czerowóny je do ùczniaków – òd spòdlëcznëch szkòłów do wëżigimnazjowëch, są téż kategòrie do ùstnëch, profesjonalëstów i szkólnëch kaszëbsczégò jãzëka ë méstrów ùszłëch edicjów. Tekstë przërëchtëją robòtnicë Ceńtrum Kaszëbsczégò Jãzëka i Kùlturë Gduńsczégò Ùniwersytetu. W Rokù Józefa Chełmòwsczégò diktowóné mdą zamkłoscë zrzeszoné z żëcym i ùtwórstwã artistë. To jich mòże szëkac w ùczbòwnikach, m. jin. w „Jantarowi Krôjnie. Dzél I” aùtorstwa Jadwidżi Héwelt, Élżbiétë Prëczkòwsczi, a téż w Pòmeranie, czë Jinternece. Zgłoszenia to mùszi sélac do 25 rujana elektroniczną pòcztą na adresã dyktandokaszubskie@szemud.pl.Fòrmùlar je przistãpny m. jin. na stronie Kaszëbskò-Pòmòrsczégò Zrzeszeniô.

    • Na kùńc serwisu jesz jedno wiadło zrzeszoné z Józefã Chełmòwsczim – ò charitatiwnëch kòńcertach na rzecz òdbùdowë jegò domôctwa.

    Bùdinczi i ògród artistë w Brusach-Jagliach znikwiła zélnikòwô chaja. Pilną sprawą sã sta naprawa zerwónégò dakù we familijny chëczë Józefa Chełmòwsczégò, bò to je téż priwatné mùzeùm. W sadze kòl bùdinkù są sztaturë i ùle w kôrczach bómów. Dokazë téż są ùszkòdzoné. Dëtczi na jich retanié mdą zbiéróné w czwiôrtk i sobòtã na kòńcertach „Niech wrócą aniołë”. Òne mdą: 5 rujana w Zalë Szopińsczégò w Kòscérznie, a 7 rujana w Aùditorium Novum Gduńsczi Pòlitechniczi, òbadwa ò 6 wieczór.

    Radio Kaszëbë, 11:55

    Udostępnij: Share on Facebook0Share on Google+0Print this pageEmail this to someone


    O zespole

    Redachtór aùdicjów Na Widnikù Kaszëbë i Dobri Dzéń Kaszëbë. Pùblikùje w Bôłtëcczim Dzénnikù, Pòmeranie i Kaszëbsczi Zemie. Prowadzy blog hebel.kaszubia.com. Kòmédiańt, nôleżnik kabaretu Kùńda i czerownik teatru Zymk.







    Back to Top ↑