Słuchaj Radia Kaszebe
    Jinfòrmacëje

    Opublikowano 8 maja, 2018 | przez Adóm Hébel

    Klëka 2018.05.08 (csb)

    • Kaszëbskô Biblotéka – wëdôwny cykel promùje kaszëbsczi jãzëk i lëteraturã w Serbie.
    • Rządowi plan rewitalizacje walijsczégò nie pòtikô sã z òdpòwiescą radzëznów krajów Walie
    • Wójt gminë Przedkòwò to je pierszi na Kaszëbach samòrządôrz z absolutiorium za łońsczi rok.

    WTÓRK, 8 maja

    • Kaszëbskô Biblotéka – wëdôwny cykel promùje kaszëbsczi jãzëk i lëteraturã w Serbie.

    Pòwstałë zbiérczi lëdowëch pòwiôstków przedolmaczonëch na serbsczi jãzëk, a téż zbiérë artiklów jaczé pòkazywają midzë jinyma jãzëkòwé szlachòwanié dwùch jãzëków z czësto jinëch strón słowiańsczégò swiata. Òd niedôwna serbsczémù czëtińcowi w pòznôwanim kaszëbsczi lëteraturë i ùczbie jãzëka mòże pòmòc kaszëbskò-serbsczi słowôrz. Robòta nad nim warała kòl 5 lat i pòkôzała, czegò jesz braknie w kaszëbsczich słowarzach – cwierdzy profesór Duszan Pażdżersczi z Gduńsczégò Ùniwersytetu, przédny aùtór słowarza. To znaczi, że mómë corôz barżi rozwiniãté słowarze, ale dërch braknie w nich wiele słowów, jaczé na co dzéń są ùżiwóné. Mòcną stroną Kaszëbskò-Serbsczégò Słowarza je frazeòlogiô. Dzãka temù Serbòwie mògą sã dowiedzëc nié blós jak rozmiec kaszëbsczé słowa, ale co znaczi, jak chtos jima rzecze “mariczné bùksë”, abò “mòje słowò to nie je dim”. Słowôrz pòwstôł dzãka robòce dwòje robòtników Gduńsczégò Ùniwersytetu i nôleżników Radzëznë Kaszëbsczégò Jãzëka – Duszana Pażdżersczégò i Hanë Makùrôt.

    • Wedle planów walijsczégò rządu w jich rodny mòwie – do 2050 rokù mô gadac dwa razë tëli lëdzy co dzysô.

    To je òdpòwiesc na efektë Nôrodnégò Spisënkù we Wiôldzi Britanie z jaczégò wëchôdô, że lëczba tëch co gôdają pò walijskù spôdô. Te planë mają bëc wdrożiwóné w biznesu, mediach i edukacje, równak donëchczas radzëznë krajów, jaczé pòdlégają walijsczi władzë nie zgłoszëłë, że są fardich na wdrożiwanié procesu. Wicy ò sprawie rzecze Adóm Hébel.

    • Wójt gminë Przedkòwò to je pierszi na Kaszëbach samòrządôrz – z absolutorium za łońsczi rok.

    Radny ni mielë żódnëch zastrzégów co do zrealizowaniô bùdżetu i welowelë jednomëslno. Gmina mô wëdóné wicy jak 60 i pół mln zł, to je 99% pierwòtnégò planu. To béł rok wiôldżich jinwesticjów – nade wszëtkò drogòwëch – taksëje wójt Andrzéj Wërzëkòwsczi. Wójt Wërzëkòwsczi òbrechòwôł, że to bëło jegò dwadzesté absolutorium, òd czedë òn czerëje gminą Przedkòwò.

    Radio Kaszëbë, 11:55 

    Udostępnij: Share on Facebook0Share on Google+0Print this pageEmail this to someone


    O zespole

    Redachtór aùdicjów Na Widnikù Kaszëbë i Dobri Dzéń Kaszëbë. Pùblikùje w Bôłtëcczim Dzénnikù, Pòmeranie i Kaszëbsczi Zemie. Prowadzy blog hebel.kaszubia.com. Kòmédiańt, nôleżnik kabaretu Kùńda i czerownik teatru Zymk.







    Back to Top ↑