Słuchaj Radia Kaszebe
    Jinfòrmacëje

    Opublikowano 2 listopada, 2018 | przez Adóm Hébel

    Klëka 2018.11.02 (csb)

    • Spòminómë zasłëżonëch lëdzy co bez ten rok òdeszlë
    • Promòcjô ksążczi ò kaszëbsczich przekładach Biblie bądze 5 smùtana we wejrowsczim mùzeùm
    • W Szëmôłdze òni sã szëkùją do mòńtowaniô òdnowialnëch zdrojów energie

    PIĄTK, 2 smùtana

    • Wszëtczich Swiãtëch i Zôdëszny Dzéń to je czas refleksje i spòminków – bez slédny rok më sã òddzãkòwelë z czile bëlnyma i zasłëżonya lëdzama.

    Ò Édmùńdze Léwańczikù, Henrikù Dawidowsczim i Bòlesu Bòrkù z Eùgeniuszã Prëczkòwsczim gôdôł Gracjón Fópka. Niécałi rok nazôd më sã téż òddzãkòwleë z Jerzim Walkùszã – ùrodzonym w Hòpòwie w kartësczim krézu dzejarzã, lëdowim artistą, załóżcą i wielelatnym czerownikã fòlkloristnégò karna Hòpòwianowie.

    • Promòcjô ksążczi ò kaszëbsczich przekładach Biblie – bądze 5 smùtana we wejrowsczim mùzeùm.

    Òna mdze sparłãczonô z òdemkniãcym wëstôwkù ò kaszëbsczich kaznodzejach. „Recepcjô kaszëbsczich dolmaczënków Biblie” to je dochtorsczi dokôz ks. Mariana Miotka. Òna je pòswiãconô przełożënkóm na kaszëbsczi jãzëk, co mają wiôldżi cësk na sztatus jãzëka i rozwij kùlturë – pòdsztrichiwô redachtór ksążczi Dariusz Majkòwsczi. Òkróm gôdczi z aùtorã ò ksążce zaplanowelë téż wëstãp Kameralnégò Chùru Discantus. To dô téż wernisaż wëstôwkù „Kaszëbsczi séwcowie Bòżégò Słowa”. Pòtkanié z ks. Miotkã w Mùzeùm Kaszëbskò-Pòmòrsczi Pismieniznë i Mùzyczi we Wejrowie bądze 5 smùtana. Zôczątk ò 6:00 wieczór.

    • W Szëmôłdze òni sã szëkùją do mòntowaniô òdnowialnëch zdrojów energie – gmina ùżorga na ten cél dëtczi wespół z gardowim samòrządã Rëmi.

    Do gromadë dostałë wicy jak 5 i pół mln zł. na dwa projechtë wôrt kòl 8 mln zł. W gminie Szëmôłd òni pòstawią 16 jinsztalacjów w òbiektach pùblëcznégò ùżëtkù i 144 w mieszkalnëch bùdinkach. Më na to dómë za régą: 1 mln 200 tës i 2 mln zł eùrodëtków – gôdô wójr Szëmôłda Riszôrd Kalkòwsczi. W Szëmôłdze òni prowadzą zôpisë na rezerwòwą lëstã, jakbë chtos z mieszkańców zrezygnowôł z zamòńtowaniô òdnowialnëch zdrojów energie. Przetôrg na zrobienié jinsztalacje mô bëc ògłoszony w tã zëmã, tak co to mdze mògło bëc zamòńtowóné na zymk.

    Radio Kaszëbë, 11:55 

    Udostępnij: Share on Facebook0Share on Google+0Print this pageEmail this to someone


    O zespole

    Redachtór aùdicjów Na Widnikù Kaszëbë i Dobri Dzéń Kaszëbë. Pùblikùje w Bôłtëcczim Dzénnikù, Pòmeranie i Kaszëbsczi Zemie. Prowadzy blog hebel.kaszubia.com. Kòmédiańt, nôleżnik kabaretu Kùńda i czerownik teatru Zymk.







    Back to Top ↑