KLËKA 23.04.2019 | WTÓRK, 23 aprila

Adóm Hébel 23 kwietnia 2019

Klëka Radia Kaszëbë, 23.04.2019 11:55

Z bezpłatnégò żłobka mdą mòglë òd séwnika kòrzëstac mieszkańcowie gminë Krokòwò | W Bëtowie felëją 2 mln zł do bùdowë przesôdkòwégò wãzła | Gmina Chmielno zaczinô òpòrządzac warënczi zabùdowë i zagòspòdarzeniô terenu

 

 

WTÓRK, 23 aprila

Z bezpłatnégò żłobka mdą mòglë òd séwnika kòrzëstac mieszkańcowie gminë Krokòwò

W Krokòwie zaczinają żłobk stawiac. On mdze nad przedszkòlim. Za nadbùdówkã przińdze wnet mln zł, z czegò gmina pòkrëje niecałé 20%. Reszta pùdze z eùrodëtków. Żłobk mô bëc dóny do ùżëtkù na zôczątkù séwnika. To dô 35 placów. Temù, że pieńdze jidąz Eùropejsczégò Spòlëznowégò Fùnduszu, minimùm przez pół rokù dozér w nim bądze bezpłatny. Starszi mdą pòkriwelë kòsztë jestkù dlô dzecka. Rekrutacjô mô bëc prowadzonô we ferie w Urzãdze Gminë Krokòwò.

W Bëtowie felëją 2 mln zł do bùdowë przesôdkòwégò wãzła

2 mln zł felëje gminie Bëtowò do zrobieniô przesôdkòwégò wãzła. O tëli zakłôdóny kòszt przekroczwô nôniższi bédënk złożony przetôrgù. Na bùdowlaną robòtã w Bëtowie òni chcelë dac 16 i pół mln zł. Cobë nie rozpisywac pòsobnégò przetôrgù na wëkònywacza bùrméster chce zaapelowac do radnëch ò zabezpieczenié dodôwkòwëch strzodków w bùdżece gminë. Jak gôdô Riszôrd Sylka – dopiérze tej mdze mógł ùgôdënk pòdpisac, a òbjim jinwesticje je baro zacht. Stôwianié przesôdkòwégò wãzła w Bëtowie bë miało nôblëższé dwa lata warac. Cél to je pòmòc w kòrzëstanim w zbiérny kòmùnikacje. Mô temù téż służëc sprawienié 3 aùtobùsów do òbsłëdżi gardowi kòmùnikacje w Bëtowie.

W Rëmi ògłosëlë casting spiéwaków

Bądze 10 maja. Dobëc jidze zajmë ze spiéwù i wëstãp na czerwińcowi galë, a dlô dobiwcë nagranié demo w profesjonalnym sztudio. To mdze czwiôrtô edicjô projechtu Rëmsczi Wokal òrganizowónégò przez Gardowi Dodóm Kùlturë w Rëmi. Cél to je rôczba do spiéwaniô młodëch i ùstnëch ë pòmòc w rozwijanim jich spiéwnégò trimù. Na przesłëchaniach mòże zaspiéwac kòżdi, chto mô 14 lat skùńczoné. Uczãstnicë castingù sami wëbiérają swój repertuar. Zakwalifikòwóny do dalszégò etapù wezną ùdzél w òbrzészkòwëch warkòwniach ze spiéwù i jinterpretacje frantówczi. Finaliscë wëstąpią na galë 7 czerwińca. W dalszi perspektiwie spiéwacë mdą sã prezeńtowelë szerszi pùblëcznoscë na gardowëch wëdarzeniach. Przesłëchania mdą 10 maja w Gardowim Dodomie Kùlturë w Rëmi w gòdzënach òd 4:00 do 8:00.

Gmina Chmielno zaczinô òpòrządzac warënczi zabùdowë i zagòspòdarzeniô terenu

Gmina Chmielno nadrôbiô zaległoscë i robi wkół òkreszleniô warënków zabùdowë i zagòspòdarzeniô terenu. Gminowi Radny przëjãlë ùchwôlënk ò rëgniãcym z òbrobienim sztërzëch planów rëmnégò zagòspòdarzeniô dlô wëjimków wsów Chmielno, Miechùcëno i Przewóz. One òbjimają dichtich teren – gôdô wójt gminë Chmielno Michôł Melibruda. Dzãka planóm rëmnégò zagòspòdarzeniô gmina Chmielno chce rôczëc jinwestorów do stôwianiô na ji terenie swòjëch pòdjimiznów – co mòże sã przełożëc na zwikszenié wzątkù do gminowi kasë.



Current track

Title

Artist

Wybierz jeden z adresów: