KLËKA 24.04.2019 | STRZODA, 24 aprila
Adóm Hébel 24 kwietnia 2019
STRZODA, 24 aprila
Wëremòńtëją socjalné jizbë w Spòdlëczny Szkòle nr 1 w Kartuzach
Rozrzeszëlë przetôrg na remòńt i przebùowę socjalnëch jizbów w Spòdlëczny Szkòle nr 1 w Kartuzach. Z 5 bédënków złożonëch przez kaszëbsczé firmë, wëbrelë pòdjimiznã 4ml budowa z Kartuz. W nôblëższim czasu mdze pòdpisóny ùgôdënk na zrobienié tegò zadaniô. To pòsobny pò remòńce dërch ajn cu pòdtopiwónégò parłãcznika etap mòdernizacje szkòłë, gôdô Mieczisłôw Grégór Gòłuńsczi, bùrméster Kartuz.
Przed wëkònywaczã stoji zadanié zrzeszoné z ùprawienim szatnie.
Wôrtnosc zadaniô to 550 tës zł. Mô bëc zrealizowóné do kùńca lëpińca.
200 tës zł wespiarcô dostôł klub nożny balë Grif Wejrowò òd wëszëznów gardu – pieńdze mają pòmòc w ùtrzëmanim sã w II lidze
Wëszëznë gardu Wejrowa pòsobny rôz dałë pieńdze na balowi klub WKS Grif. Ugôdënk je ju pòdpisóny. Tą razą na kòńto klubù pùdze dodôwkòwé 200 tës zł. „Klub promùje gard – më gò mùszimë wespiérac” – pòdsztrichiwô prezydeńt gardu Wejrowa, Krësztof Hildebrańt.
Fùndusz nie je czerowóny na kònkretny cél. Te dëtczi jidą na fąkcjonowanié i mają pòmòc Grifòwi sã ùtrzëmac w II lidze.”Naja sytuacjô je drãgô, le më sã nie pòddómë” – pòdsztrichiwô przédnik klubù Pioter Ruszewsczi.
Grif Wejrowò to jedurny kaszëbsczi klub w II lidze. Terô pò 29 kòléjkach je w spôdkòwi zonie. Mô 16 plac w tabelë i do gwësny lokatë tracy jeden pąkt. Na òdrobienié stratów karnu òstało 5 pòtkaniów.
Mieszkańcowie gminë Szëmôłd òdpòwiedzą na pëtania co sã tikają zmianów w aùtobùsowi kòmùnikacje
W gminie Szëmôłd prowadzą badérowania preferencjów i kòmùnikacjowëch zachòwaniów mieszkańców. Lëdze z jidentifikatorama chòdzą pò chëczach. Przebadérëją do gromadë 1000 mieszkańców òd Bãdargòwa aż do KArczemków. „Efektë mògą zadecydowac ò nowëch aùtobùsowëch sparłãczeniach z Trzëgardã” – pòdsztrichiwô wójt gminë Szëmôłd Riszôrd Kalkòwsczi.
Badérowania na zlecenié Metropòlitalny Kòmùnikacyjny Zrzeszë Gduńsczégò Wikù realizëje firma PBS ze Sopòtów. Zaczãłë sã na zôczątkù aprila i mdą dérowałë do kùńca czerwińca.
