KLËKA 26.04.2019 | PIĄTK, 26 aprila

Pierszi w gminie Tëchòmié żłobk je wnet fardich – mô bëc ôpen w czerwińcu|Banof w Kòscérznie dobéł prestiżowi titel „Zadbónégò Zabëtkù”|Na kaszëbską nótã tradicjowò mdze majówka w Ostrzëcach w gminie Somònino

PIĄTK, 26-ti aprila

Pierszi w gminie Tëchòmié żłobk je wnet fardich – mô bëc ôpen w czerwińcu

Pierszi w gminie Tëchòmié żłobk je wnet fardich. Dzôtczi mdą mògłë z niegò kòrzëstac ze zôczątkã czerwińca.
Bùdink je przë spòdlëczny szkòle. Dozér tam naléze 20 dzecy w wiekù do trzech lat. – Żłobk je terô dopòsażiwóny, zatrudniwómë téż personél – gôdô wójt gminë Tëchòmié Jerzi Léwi Czedrowsczi
Gmina pòstawiła téż plac jigrów, chòdniszcze, parkplac i bënową drogã. Kòszt sã zamkł w jednym mëlionie zł. Wnet pòłowã tëch dëtków to je dotacjô Minysterstwa Familie, Robòtë i Spòlëznowi Pòliticzi.

Banof w Kòscérznie dobéł prestiżowi titel „Zadbónégò Zabëtkù”

Banóf w Kòscérznie to je Zadbóny Zabëtk. Prestiżowi titel delë w Gdinie na ùroczësti galë z leżnoscë Midzënôrodnégò Dnia Ochronë Zabëtków. Nôdgroda w kònkùrsu Minysterstwa Kùlturë i Nôrodny Spôdkòwiznë to je nôwôżniészé wëprzédnienié za bëlné zwënédżi w òbrëmienim kònzerwacje zabëtków w Pòlsce. Trafia do Kòscérznë „za wzorową adaptacjã i rewitalizacjã, co pòzwòliwô na ùtrwalenié i wëekspònowanié òrginalnëch architektonicznëch elemeńtów zabëtkòw, ùchòwanié pierwòtnégò métla kòrzëstaniô z banofù i dostosowanié gò do nowëch fąkcjów”.
W jistny kategòrie delë téż wëprzédnienié – za kònzerwatorską robòtã przeprowadzoną w Stôri Aptéce we Gduńskù. Pò jich skùńcznim to je nowô bina Teatru Ubrzég.

Na kaszëbską nótã tradicjowò mdze majówka w Ostrzëcach w gminie Somònino

Jidze majówka, a to znaczi, że w Ostrzëcach w gminie Somònino mdą miónczi kùczrów i biesada.
Tradicjowò zôczątk maja tam je òbsztëlowóny na Wiśta Wio, to je Turniér Kùczrów i miéwców zëmnokrëwistëch kòniów na Kaszëbach. – Miónczi mdą na biwakòwim pòlu Stolëmk, przewidzelë wiele sprawnoscowëch i chùtkòscowëch kònkùrencjów – gôdô direchtór somònińsczégò GOK-ù Angelika Zabòrowskô.Drëdżi maja to w Ostrzëcach Kabaretnô Biesada Bëlny wic. Zôczątk kabaretnëch wëstãpów 2 maja w Ostrzëcach zaplanowelë na 7:00 wieczór.

Trzë dni zgłãbiwaniô filmòwëch krëjamnotów – to jeden z bédënków w Gdinie na majówkã. Rozegracjã pòd zéwiszczã „Nakręć się” òrganizëje Centrum Nôùczi Experimeńt przë wespółrobòce z Gdińską Filmòwą Szkòłą.
To sã mdze mógł przekònac jak pòwstôwałë filmë w stilu Gwiezdnëch wòjnów i samémù stwòrzëc animacje przez òżëwienié fantasticznëch jistwów. – To mdze sã mógł wcelëc w rolã reżisérë, òperatora czë zwãkòwca – òpusywô Maja Banaszczik z gdińsczégò Esperimeńtu:
Majówka „Nakręć się” w Centrum Nôùczi Experimeńt mdze dérowa òd 1 do 3 maja w gòdzënach 11:00-5:00 pp. Filmòwé atrakcje mdą przistãpné w òbrëmienim bilietu wstãpù. Ale w Gdinie to dô téż wiele bezpłatnëch atrakcjów. Wiadła ò nich zebrelë na gardowim pòrtalu www.gdynia.pl.