Słuchaj Radia Kaszebe
    Gduńsk

    Opublikowano 16 grudnia, 2016 | przez Adóm Hébel

    Jak wëzwëskac jinternetowé memë w ùczbie?

    Jak wëzwëskac jinternetowé memë w ùczbie ë co zrobic, żebë lekcje kaszëbsczégò nie bëłë nudné – na te pëtania szëkô òdpòwiescë Karno Młodi Didakticë.

    – Cykel „Kaszëbsczé pëtania” mô za zadanié nalézenié prakticznëch rozrzeszeniów z jaczima sã pòtikają szkólny kaszëbsczégò w dzysdniowi edukacje – gôdôł ò tim na naji antenie Mateùsz Archacczi, nôleżnik Kòła Didaktików.

    Grëpa jakô fąkcjonëje przë Gduńsczim Ùniwersytece rôczi na pòniedzôłkòwé midzëwëdzélowé wëkładë. Niedôwno Didakticë zabédowelë trzë scenarniczi ùczbów jaczé wëzwëskiwają zdrzódłowé tekstë òpiarté na legeńdach i brawãdach, chtërne zakłôdają pòznanié historiów przez ùczniaków a pózni stwòrzenié jinternetowëch memów i dramaticzny scenczi. Na dënëdze pòpùlarnoscë lëteraturë i filmù fantasy më chcemë pòkazac, że te mòtiwë jidze nalézc w najëch tradicjowëch tekstach – argùmeńtëją Didakticë. Samò karno zbrzątwiô przińdnëch szkólnëch kaszëbsczégò jãzëka, le téż sztudérów, jaczi chcą robic jakno szkólny pòlsczégò. Bëtnosc w karnie dôwô nama mòżlëwòtã ùczeniô sã warstatu pedagòga, a równoczasno pòmòc jinyma – rzekł nama Mateùsz Archacczi. Didakticë prowadzą zajmë z pòlsczégò jãzëka dlô sztudérów z Chinów. Młodi Didakticë na Gduńsczim Ùniwersytece òrganizëją téż kùlturalné wëdarzenia taczé jak Kabaretnô Barbórka. Gôdkã z najim gòscã mòże òbezdrzec na radiokaszebe.pl.

    Klëka Radia Kaszëbë, 16.12.2016

    Foto: Młodzi Dydaktycy – koło naukowe na UG

    Udostępnij: Share on Facebook0Share on Google+0Print this pageEmail this to someone


    O zespole

    Redachtór aùdicjów Na Widnikù Kaszëbë i Dobri Dzéń Kaszëbë. Pùblikùje w Bôłtëcczim Dzénnikù, Pòmeranie i Kaszëbsczi Zemie. Prowadzy blog hebel.kaszubia.com. Kòmédiańt, nôleżnik kabaretu Kùńda i czerownik teatru Zymk.







    Back to Top ↑