Słuchaj Radia Kaszebe
    Jinfòrmacëje

    Opublikowano 10 stycznia, 2017 | przez Adóm Hébel

    Klëka 2017.01.10 (csb)

    • Òdnowionô i òdrestaùrowónô – familijnô kòlekcjô Majkòwsczich wróca do wejrowsczégò mùeùm.
    • Co trzecą złotówkã w swòjim bùdżece gmina Kôrsëno dô na jinwesticje. To mdze rekòrdowi rok.
    • Wicy jak 1 mëlión 600 tësący ùdëtkòwieniô dosta gmina Lëzëno na energeticzną mòdernizacjã szkòłów.

     


    WTÓRK, 10 stëcznika

    • Jeden òd nôbarżi wôrtnëch zbiérów wejrowsczégò Mùzeùm Kaszëbskò-Pòmòrsczi Pismieniznë i Mùzyczi – familijnô kòlekcjô Majkòwsczich pò pôrã miesącach renowacje wróca do placówczi.

    Kònzerwacjã 450 òbiektów – céchùnków, szablonów na wësziwk ë szklónëch i celulojidowëch negatiwów òni przeprowadzëlë dzãka dëtkòwi pòmòcë Minysterstwa Kùlturë i Nôrodny Spôdkòwiznë i wejrowsczégò krézowégò starostwa. Gôdô direchtór mùzeùm Tomôsz Fópka. Aleksandér Majkòwsczi to béł bëlny pisôrz i wespółùtwórca Młodokaszëbsczi rësznotë, jegò sostra Frãcyszka 60 lat nazôd stwòrzëła wejrowską szkòłã wësziwkù. Latos mijô téż 50 roczëzna ji smiercë, z ti leżnoscë zbiér rodzeństwa to mdze mógł pierszi rôz pòdzywiac we wejrowsczim mùzeùm na wëstwkù pòswiãconym żëcémù i ùtwórstwù artistczi. Kònzerwacjô zbiéru Majkòwsczich kòszta 62 tës zł z czegò 45 tës szło z minysterialnëch dëtków.

    • Wnet 30 procent bùdżetu gmina Kôrsëno – dô latos na jinwesticje.

    To mdze rekòrdowi rok jeżlë jidze ò finanse – zapòwiôdają wëszëznë samòrządu. W przëjãtim przez radnëch ùchwôlënkù nôwôżniészô jinwesticjô to je mòdernizacjô òczëszczalnie sceków w Cysewiu, za ji pòstawienié przińdze wicy jak 3 mëliónë złotëch. Wëszëznë Kôrsëna planëją téż, wôrtną 2 mln zł przebùdowã sztrasë ks. Wrëczë we Wielim i pòstawienié kòłowi stegnë z Wielô do Kôrsëna. Te wszëtczé jinwesticje më zrealizëjemë dzãka eùrodëtkóm – gôdô wójt Róman Brunka. Pòsobną wiôlgą jinwesticją latos mdze skùńczenié bùdacje nowi sedzbë Ùrzãdu Gminë. Na ten cél to dô 2 mln zł.

    • Wicy jak 1 mln 600 tës zł ùdëtkòwieniô dosta gmina Lëzëno – na energeticzną mòdernizacjã bùdinków pùblëcznégò ùżëtkù.

    To jidze ò całowné remòńtë szkòłów. Òd docepleniô scanów, wëmianë òknó i dwiérzów do mòdernizacje abò wëmianë jinsztalacje ògrzéwaniô i zdrojów cepła. W spòdlëczny szkòle w Robôkòwie mdą zamòńtowóné kòndensacjowé gazkòtłë, we Wëszëcënie i Zelewie za to pómpë cepła i gazkòtłë jakno alternatiwné zdrój cepła. Ùgôdënk w sprawie ùdëtkòwieniô je ju pòdpisóny. Dotacjô z Regionalny Òperacjowi Programë Pòmòrsczégò Wòjewództwa pòkrëje wnet 60% kòsztu rechòwónégò na wicy jak 2 mln 700 tësący złotëch.

    Foto: Muzeum Wejherowo

    Radio Kaszëbë, 11:55

    Udostępnij: Share on Facebook0Share on Google+0Print this pageEmail this to someone


    O zespole

    Redachtór aùdicjów Na Widnikù Kaszëbë i Dobri Dzéń Kaszëbë. Pùblikùje w Bôłtëcczim Dzénnikù, Pòmeranie i Kaszëbsczi Zemie. Prowadzy blog hebel.kaszubia.com. Kòmédiańt, nôleżnik kabaretu Kùńda i czerownik teatru Zymk.







    Back to Top ↑