Słuchaj Radia Kaszebe

    Opublikowano 25 stycznia, 2017 | przez Adóm Hébel

    Òska – Karno Młodëch w Lëzënie

    Pùdą swòją drogą, le mdą òdemkłi na jinëch – w Lëzënie pòwstôwô Karno Młodëch Kaszëbów “Òska”. Òsczi są pòtrzébné, żebë zapëliwac kwiatë, ale rozmieją téż ùżądlëc. Mdze miało Karno Młodëch w Lëzënie z taką pòzwą znanczi tegò òwada?

    „Młodi mają swòje ùdbë i spòsobë jich realizacje. Naszim zadanim je jima nie przeszkadzac, a jesz pòmòc.” – gôdô Mark Mùdlawa.

    To mdze wiedzec pò załóżczim zéńdzenim jaczé mdze 28 stëcznika ò 5 pò pôłnim w hòtelu Czardasz w Lëzënie. Na terô je zgłoszoné kòle 80 ùczãstników jaczi mdą dikùtérowac ò planach na spòlëznową aktiwizacjã młodzëznë w Lëzënie. Na terô ùdbë są rozmajité: òd pòznôwaniô tradicjowëch warków do twòrzeniô karnôla na Youtube. Lëdze sami zgłosziwają sã z jinicjatiwama, ò czim gôdała na naszi antenie jinicjatórka pòwstaniô karna Katarzëna Kankòwskô-Filëpiôk.

    Ò dokładnym przebiégù warkòwniów mdze wicy wiedzec pò sobòtnym zéńdzenim, na jaczé mòże sã zapisywac.  Sygnie nalézc na Facebookù wëdarzenié Koło Młodych Kaszubów – zebranie założycielskie. Karno mô miec samòstójny charaktér, le mdze wespółrobiło z Lëzyńsczim Partã K-PZ w jaczé je wpisóné, a téż ze zdrëszonym karnã Cassubia czë Kaszëbską Jednotą. Chòc karno jesz fòrmalno nie je założoné, rozmajité strzodowiszcza ju deklarëją chãc realizowaniô pòspólnëch jinicjatiwów. Rolô lëzyńsczégò partu Zrzeszeniô mdze pòléga na doradach, le nie mdzemë jingerowac w ùdbë chtërnëch młodim nie felëje – zagwësniwô przedstôwca partu Mark Mùdlawa.

    Zéńdzenié mdze w sobòtã w hòtelu Czardasz w Lëzënie ò 5 pò pôłnim. Przińc mòże kòżdi niezanôléżno òd wiekù. Gôdkã z najima gòscama je do òbezdrzeniô na radiokaszebe.pl

    Dobri Dzéń Kaszëbë, 25.01.2017

    Udostępnij: Share on Facebook0Share on Google+0Print this pageEmail this to someone


    O zespole

    Redachtór aùdicjów Na Widnikù Kaszëbë i Dobri Dzéń Kaszëbë. Pùblikùje w Bôłtëcczim Dzénnikù, Pòmeranie i Kaszëbsczi Zemie. Prowadzy blog hebel.kaszubia.com. Kòmédiańt, nôleżnik kabaretu Kùńda i czerownik teatru Zymk.







    Back to Top ↑