Klëka 2019.04.04 (CSB)

• W gminie Somònino òni skùńczą sztrasã Kasztelańską co parłãczi Somònino z Gòrãczënã.
• Wejrowianowie òd lëpinca wicy za smiecë zapłacą.
• W Kòscérznie ùczniacë spòdlëczny szkòłë nr 6 w sobòtã mdą żdelë za elektrosmiecama.

CZWIÔRTK, 4 aprila

• W gminie Somònino òni skùńczą sztrasã Kasztelańską co parłãczi Somònino z Gòrãczënã

W gminie Somònino skùńczą Kasztelańską sztrasã. To je szpùr co parłãczi Somònino z Gòrãczënã, wëkùńczi gò firma Dromos z Kartuz.
Gmina Somònino wëbra wëkònywacza drëdżégò etapù robòtë. W pierszim łoni òd spòdlégò zrobilë jezdniã na szutrowi i dzurawi drodze. Terô je czas na slédną szëchtã – gôdô wójt Marión Kòwalewsczi.
Skùńczenié bùdowë Kasztelańsczi i Ceramiczny mdze kòształo wicy jak 5 mln zł.

• Wejrowianowie òd lëpinca wicy za smiecë zapłacą

Wejrowianowie wicy zapłacą za smiecë. Pòdwëżkã òd latoségò lëpińca wprowadzywô ùchwôlënk przëjãti przez radzëznã gardu na slédny sesje.
Za òdpadë segregòwóné wësokòsc to je 16 zł na miesądz za jednégò mieszkańca. W przëtrôfkù brakù segregacje to je nót zapłacëc dwa razë wicy, bò 32 zł. Jedną z przëczënów pòdwëżczi je roscącô lëczba smiecy òdebiérónëch òd Wejrowianów – òd 2014 rokù òna ùrosła ò trzecy dzél. Roscą téż jednostkòwé kòsztë òdbiéru i zagòspòdarzeniô òdpadów. To są m. jin. kòsztë, robòtë, elektriczny energie, paliwów, ùsłëgów. Nade wszëtkò równak zacht ùrosła strzodowiszczowô òpłata za składowanié òdpadów na wësëpiszczu ùstaliwónô przez rząd i òdprowadzywónô do bùdżetu państwa – ze 120 do 170 zł za tonã.
Odbiér i zagòspòdarzenié òdpadów sã mùszi ùdëtkòwic z òpłatów òd mieszkańców – më czëtómë w jinfòrmacje Urzãdu Gardu Wejrowa. Zmiana stôwków nie mdze wëmùsziwa skłôdaniô nowi deklaracje przez miéwców nierësznosców – në, mòże że na przëmiôr mdą chcelë zmienic métel zbiéraniô smiecy z niesegregòwónëch na segregòwóné.

W Bëtowie òni zapisywają chãtnëch do ùdzélu w zajmach Uniwersytetu Trzecégò Wiekù. Słëchińcã mòże bëc kòżdi pò 50-tim rokù żëcô, mô sztatus emerita abò je na reńcë i mieszkô w gminie Bëtowò.
Do projechtu zakwalifikùją 50 lëdzy. Pierszé place dadzą tima, co rëchli nie chòdzëlë na zajmë Uniwersytetu. – Chcemë sztôłcëc na ten métel ùstnëch i nieaktiwnëch warkòwò – gôdô bùrméster Bëtowa, Riszôrd Sylka. Łoni zajmë sã ceszëłë wiôldżim zajinteresowanim.
Przińdny słëchińcowie bëtowsczégò Uniwersytetu Trzecégò Wiekù bë mielë złożëc deklaracjã w gardowi biblotéce. Nabiér je prowadzony na zajmë w latach 2019-21

• W Kòscérznie ùczniacë spòdlëczny szkòłë nr 6 w sobòtã mdą żdelë za elektrosmiecama

Stôri telefón czë wëbrëkòwóné baterie to mòże w tã sobòtã w Kòscérznie halac do Spòdlëczny Szkòle nr 6. Uczniacë ti szkòłë prowadzą zbiérkã elektrosmiecy i liczą na wespiarcé mieszkańców gardu.
Oni mdą żdelë przed szkòłą òd ósmi reno. Łoni zebrelë 8 tonów òdpadów. Halac to mòże nawet stôré mònitorë, pralczi, lodówczi i kòmpùtrë. – Wszëtkò, co më mòżemë sklasyfikòwac jakno wëbrëkòwóny elektrosprzãt – gôdô kòòrdinatórka akcje Kadzmiéra Lidka.
Elektrosmiecë òdebierze szpecjalisticznô firma, niejedne mdą jesz rôz przetwòrzoné. Zbiérka przed spòdlëczną szkòłą nr 6 w Kòscérznie mdze w sobòtã òd 8:00 do 3:00