KLËKA 22.05.2019 | STRZODA, 22 MAJA

We gminie Chòczewò letnicë ë mieszkańcë mògą ju jezdzëc pò nowi stegnie dlô kòłów miedzënôrodnégò szlachù R10 | Ten slédny mòmant mają młodi mieszkańcë Trzëgardu ë òkólstwa na ùdzél we welacyjnym kònkùrsu „Weź zagłosuj” | Mieszkańcë Żukòwa zwiedzą zmòdernyzowóny bùdink Spikrza. W sobòtã mdze òtemkłi dzéń òbiektu.

Strzoda, 22 maja

We gminie Chòczewò letnicë ë mieszkańcë mògą ju jezdzëc pò nowi stegnie dlô kòłów miedzënôrodnégò szlachù R10

We gminie Chòczewò letnicë ë mieszkańcë mògą ju jezdzëc pò nowi stegnie dlô kòłów, jakô je fragmańtã szlachù R10. Nen dzél mô wnetka 18 km. Jidze zwiksza przez lasowé terenë. Całowny kòszt jinwesticëje w grëpie z dokùmańtacëją to przez 1 mëlión 200 tës. zł. Wnetka 35% mają sfinancowóné Państwòwé Lasë. 20% mô dofinancowóné Eùropejskô Ùnijô w òbrëmim Rejonalnégò Programù Òperacyjnégò Pòmòrsczégò Wòjewództwa. W zadanim „Pòmòrsczé kòłowé trasë ò miedzënôrodnym znaczenim R10” miało téż swój dzél pôrã jinëch kaszëbsczich gmin. Jesz latos Gmina Chòczewò planëje wëkònac òznaczenié ny kòłowi trasë. Szlach R10 jidze przez 9 państw. Swój zaczątk mô na niemieckò-deńsczim pògrańczim, dali jidze złużą Wiôldżégò Mòrza ë mô swój kùńc w Kòpenhadze. Pòspòle to wnetka 8 tës. km.

Ten slédny mòmant mają młodi mieszkańcë Trzëgardu ë òkólstwa na ùdzél we welacyjnym kònkùrsu „Weź zagłosuj”

Metropòlitalny Teren Gduńsk-Gdina-Copòt òrganyzëje kònkùrs dlô młodëch „Weź zagłosuj”. Je mòżno dobëc m.jin. dwa miesące rézowaniô pò Eùropie abò rézã z drëchama do Brukselë. Wëdarzenié mô zwikszëc frekwencëją w nadchôdający welacëji do Eùropejsczégò Parlamańtu. Do akcëje mô sã przëłączoné miedzë jinëmi gmina Lëzëno. Kònkùrs je sczerowóny do młodëch òd 14 do 21 lat stôrëch. Ùczãstnik kònkùrsu sóm wëbiérô fòrmã jinycjatiwë, jaką móże bëc kampanijô w spòlewëch médiach, debata abò happening. Zgłoszenia są przëjimóné jindiwidualno abò w karnach do 28. maja. Wszëtczé drobnotë jidze nalezc na jinternetowi stronie akcëje ë na wëdarzenim na Facebook’ù.

Mieszkańcë Żukòwa zwiedzą zmòdernyzowóny bùdink Spikrza. W sobòtã mdze òtemkłi dzéń òbiektu.

W sobòtã mieszkańcë Żukòwa mdą mielë leżnosc zwiedzëc Ceńter Kùlturë Spikrz. Òtemkłi dzéń je leżnoscą do òbezdrzeniô zmòdernyzowónégò òbiektu. Jinwesticëjô je realizowónô w òbrëmim projektu “Rewitalizacëjô Stôrégò Ceńtra Żukòwa”. Bùdink sã ùdało nóm zretac dzãka ùnyjnémù dofinancowaniémù, gôdô bùrieméster gminë Żukòwò, Wòjcech Kankòwsczi. W òbiekce mdą sã miescëłë Strefa Kùlturë ë Ceńter Aktiwnoscë Familij. Spikrz bądze placã pòtkaniów ë kòncertów, pòdsztrichùje Wòjcech Kankòwsczi. Òtemkłi dzéń w Ceńtrum Kùlturë Spikrz w sobòtã, 25. maja w gòdzënach òd 11:00 do 02:00 òd pôłnia. Na 07:00 òd pôłnia je zaplanowóny szpetôkel Téatru Żukòwsczi Zemie.