KLËKA 25.04.2019 | CZWIÔRTK, 25 aprila

CZWIÔRTK, 25 aprila

Familia ze Swôrzewa zbiérô strzodczi na òperacjã co retëje dłonie jich dwalatnégò synka

Nie zgôdzają sã na ampùtacjã czikców kòl dwalatnégò synkka i biôtkùją ò szansã dlô niegò na normalné żëcé. Starszi môłégò Wòjka ze Swôrzewa w gminie Pùck zbiérają pieńdze na òperacjã pòwôżny geneticzny felë. Wòjk cerpi m. jin. na dwastronny brak parmieniowëch gnôtów i felã sërca. Chòroba je nazéwónô karnã TAR i przez niã rãce knôpa sã wëdżibają na sztôłt lëtrë L. Z latama fela mdze sã rozwija i ból mdze wiedno wikszi. Szansã na ùretanié dłoniów dwalatka dôwô òperacjô, jaką w Pòlsce mòże zrobic amerikańsczi szpecjalista. Do òperacje w serzpniu felëje jesz 230 tës zł. Starszi są zdeterminowóny żebë zebrac dëtczi i dac knôpòwi szanse na sprawné rãce. Zbiérka w jinternece mdze dérowa do 5 lëpińca. Chãtnëch do pòmòcë më czerëjemë pòd adresã “siepomaga.pl/operacja-wojtusia”. Wicy na facebookù pòd zéwiszczã „razem dla Wojtka”

Më jesz òstôwómë w pùcczim krézu, le przechôdómë do Wiôldżi Wsë. W niedzelã tam bądze wëlowanié za Prowadnyma Radzëznów Fërtlów. Wëlowaniô nie mdzze le w Halrowie, dze sã nie zgłosył nicht chãtny do ti fąkcje. Do gromadë mają zaregistrowóné 9 kańdidatów. Nôwicy chãtnëch do prowadzeniô radzëznë fërtla je na Szotlandze, tam sã zgłosëłë 4 òsobë. Na òsedlëszczu Czisowô je 3 kańdidatów i pò jednym w Cetniewie i Westrzédnym Gardzze. Wëlowné lokale mdą ôpen w niedzelã òd 9:00 do 3:00. Bądą w spòdlëcznëch szkòłach nr 2 i 3, w Parafialnym Dodomie i Gardowim Urzãdze. W przëtrôfkù Halowa ògłoszą drëdżi termin nabiéru. Szôłtësów w gminie Wiôlgô Wies wëbiérelë pòd kùńc marca.

W Strëszi Bùdze bądze sztatura pòswiãconô Janowi Trepczikòwi i Aleksandrowi Labùdze

W Strëszi Bùdze w gminie Kartuzë bądze kam co ùpamiãtniwô Jana Trepczika i Aleksandra Labùdã. Chcą ùpamiãtnic przédników Zrzeszińców, co w midzëwòjnowim 20-lecym pòdszrichiwelë sztatus kaszëbsczégò jãzëka i promòwelë nôrodną apartnosc Kaszëbów. Oprócz Mariusza Szmëtczi, przédny ùdbòdôwôcz i fùndatór òbeliskù to Eùgeniusz Prëczkòwsczi.
Kam w Strëszi Bùdze bądze na terenie Kaszëbsczégò Parkù Miniaturów. Uroczësté òdsłoniãcé je planowóné na séwnikòwim òdpùscë Matczi Bòsczi Séwny w Swiónowie.

We Gduńskù w niedzelã mdze premiérowé wëkònanié „Piôsznicczégò Lameńtu”

We Gduńskù w niedzelã mdze òsoblëwi kòncert – premiérowé wëkònanié projechtu „Piôsznicczégò Lameńtu”. Do tekstów wëcygniãtëch z tomikù wiérztów „Piaśnica oczyma Poetów” mùzykã skòmpònowôł Szëmón Chilińsczi z karna Folk Acoustic. Projecht pòwstôł w 80 roczëznã wëbùchù II Swiatowi Wijnë – z mëslą ò rozkòscérzanim spòlëznowi swiądë i dlô ùtczeniô pamiãcë pòmòrdowónëch przez Miemców w piôsznicczich lasach. Na Piôsznicczi Lameńt sã skłôdô 10 dokazów, w tim 3 w kaszëbsczim jãzëkù. Kòńcert bądze w niedzelã ò 7:00 we gduńsczim kòscele Niepòkôlónégò Pòczãcô Nôswiãtszi Marije Pannë.