KLËKA 19-04-18 (CSB)

• W gminie Lëniô òni sã spòdzéwają rekòrdowi lëczbë dokazów w 24. kònkùrsu wësziwkù
• Cobë prowadzëc szlachtowanié na swój ùżëtk gbùrze mùszą miec ùprawnienia – przëbôcziwô Pòmòrsczi Ostrzódk Gbùrsczi Doradzëznë
• W Gdinie pòjastrowi wtórk to mdze Festiwal Dzecny Lëteraturë „Koci Łapci”

CZWIÔRTK 18-ti aprila

• Rekòrdowi lëczbë dokazów w 24. kònkùrsu wësziwkù òni sã spòdzéwają w gminie Lëniô

W gminie Lëniô òni sã spòdzéwają rekòrdowò wiele dokazów w Wòjewódzczim Kònkùrsu Wësziwù. W 24-ti edicje minął ju czas deklaracjów, terô mùszi wëkùńczëc i przesłac òbiécóné serwetë, tôflôczi, czepcë czë chùstë. Taksowóné mdą blós nowé dokazë, rãczno zrobioné wedle kanonów kaszëbsczégò wësziwkù. Rekòrdowi béł ju łońsczi rok, czej przëszło do gromadë 430 prôców. – Nôdzejã na przińdnotã dôwô to, że przez pòłowa z 201 ùczãstników to bëłë dzecë i młodi – gôdô wójt gminë Lëniô Bògùsława Engelbrecht.

Pòdrechòwanié Wòjewódzczégò Kònkùrsu Wësziwkù je kòżdi rok w czerwińcu, w Gminowim Dodomie Kùlturë w Lëni. Towarzi mù òdemkniãcé pòkònkùrsowégò wëstôwkù.

• Cobë prowadzëc szlachtowanié na swój ùżëtk gbùrze mùszą miec ùprawnienia – przëbôcziwô Pòmòrsczi Ostrzódk Gbùrsczi Doradzëznë

Cobë szlachtowac zwierzãta w swòjim gòspòdarstwie to mùszi miec ùprawnienia – przëbôcziwô Pòmòrsczi Ostrzódk Gbùrsczi Doradzëznë. Na drëdżi tidzéń òn robi szkòlenié w ti sprawie. Przepisë dopùszcziwają dzysô szlachtowanié zwierzãtów na terenie gòspòdarstwa, le blós na swój ùżëtk i przez lëdzy z kwalifikacjama. Pò szlachtowanim miãso mùszi bëc przebadérowóné przez weterinarijné służbë – klarëje zôstãpca direchtora PODR w Lubaniu Éwa Szëmańskô.
Szkòlenié je płatné i czerowóné do lëdzy co mają 18 lat skùńczoné. To mùszi téż zgłosëc swój ùdzél do Pòmòrsczégò Ostrzódka Gbùrsczi Doradzëznë.

• W Gdinie pòjastrowi wtórk to mdze Festiwal Dzecny Lëteraturë „Koci Łapci”

Mùzeùm Gardu Gdinie w pòjastrowi wtórk sã zamieni w stolëmną biblotékã. Drëdżi rôz tam mdze Festiwal Dzecny Lëteraturë Koci Łapci.
Wëdarzenié je òrganizowóné w òbrëmienim Midzënôrodnégò Dnia Ksążczi do Dzecy. – Më chcemë na festiwalu ùmòżlëwic pòznanié bédënkù najëch gdińsczich ksãgarniów – gôdô Béjata Szadżul, fùlmòcnik prezydeńta Gdinie do sprawów familie.
Koci Łapci to nié le wëstôwk ksążków i mòżlëwòta kùpieniô jich w atrakcjowëch prizach. To téż zeriô warkòwniów dlô młodëch czëtińców i jich starszich.
Wëkładë pòprowadzą m. jin. Jack Frédrich, direchtór Mùzeùm Gardu Gdinie i Élżbiéta Zubrzëckô, załóżcka Gduńsczi Psychòlogiczny Wëdôwiznë. Wstãp na Koci Łapci je wòlny. Festiwal mdze 23 aprila w Mùzeùm Gardu Gdinie w gòdzënach òd 2:00 do 5:00.