Spòrtowé emòcje ë wieczór zamiszleniô w gminie Krokòwa

Wieczórnica ë spòrtowé miónczi – to je bédënk dlô mieszkańców gminë Krokòwa na 11 nowémbra. Państwòwé swiãto ë wòlny dzéń òd robòtë chcą tam wëzwëskac na jintegracją.

Mdze tej II Familijny Biég we Wierzchùcënie, kòłowé miónczi CYKLO GRAVEL w Żarnówcu ë turnér rãczny balë w Gruńtowny Szkòle w Krokòwie. Òb wieczór bądze mòżno przińc do pòdstawówczi w Żarnówcu na przërëchtowóną przez dzecë „Wieczórnicã”. Ji głównô téma je jak wiedno trzimóną do òstatny chwilë tajemnoscą.

Spetôczel w Żarnówcu mdze ò gòdzënie 05:00 òd pôłnia ë bądze zwińczenim fejrowaniô w gminie Krokòwa.