CZWIÔRTK, 10 SÉWNIKA | KLËKA 10.09.2020

Klôsztornice z Żôrnówca chcą stwòrzëc kòntemplacjową jizbã sw. Benedikta dlô òdwiedzającëch klôsztor. Na zómkù w Bëtowie skùńczą sã problemë z ceknącym dakã. Gmina Przechlewò zmienia przewòznika, równak transpòrt ùczniów do szkòłów je zagwësniony.

CZWIÔRTK, 10 séwnika

W Żôrnowcu mô pòwsca Zacësze swiãtégò Benedikta – hewòtné klôsztornice zbierają dëtczi na nen cél. 

Mô to bëc plac cëszë i skùpieniô. To tuwò mają sã òdbiwac rekòlekcje dlô òdwiedzającëch klôsztor. Na pierwszi cząd robòtów je nót 700 tës. zł, a do nenczas wëzebrano leno czilenôsce. Wicy Pioter Szëca. 

Dak bëtowsczégò zómkù kùreszcze przestónie ceknąc. Kò prawie regnął jegò òglowi remònt. 

Gòticczi krzëżacczi zómk je jedną z nôwiãkszich atrakcjów Bëtow, je tam ùplacowioné m.jin. Zapadno-Kaszëbsczi Mùzeùm. Renowacjô dakù òbjimô 1000 kwadrat métrów òd starnë frontu. – Wëmiana skòrodowónëch elemeńtów a wëfùlowanié ùbëtków nie mdze mia cëskù na wëzdrzadk bùdinkù – gôdô direktór Bëtowsczégò Ceńtrum Kùlturë Marión Gòspòdarek. Robòtë mdą warałë do kùńca rujana i mdą kòształë co le mało pół miliona zł. Bãdą sfinansowóné bez gminã Bëtowò – miéwcã zómkù – przë wspiarcym zwëskónëm dzãka Lokalnej Grupie Działania Partnerstwo Dorzecze Słupi.

Dzecë mają zagwësniony transpòrt do szkòłów – pòdczorchiwô gmina Przechlewò.

Czej nie ùda sã doprzińc do pòrozumieniô w sprawie ùtwòrzeniô pòwiatowò-gminowégò Zakładu Kòmùnikacje, w Przechlewie ògłoszëlë przetarg na dowòzë dlô ùczniów. Dobëł w nim PKS Bëtowò, chtëren òbsùgùje terô prawie drëdżi dzél wszëtczich dowòzów. Dzél dojazdów òrganizëje téż gmina gwësnyma aùtobùsama. PKS Bëtowò mdze wòzył ùczniów do kùńca warającégò szkòłowégò rokù.