CZWIÔRTK, 3 SÉWNIKA | KLËKA 03.09.2020

Za bùdżet z jinwesticjama na wicy 30 mln zł – absolutorium dostôł bùrméster Rëmi. W Lãbòrgù miejskô samòrządzëna dała wspòmóżkã na remònt wieżë nôstarszégò kòscoła w miesce. Latos w Internece KRÙS przeprowadzô kònkùrs ò bezpieczny robòce na gbùrstwie.

CZWIÔRTK, 3 séwnika

Łoni bùdżet Rëmi òstôł bëlno wëkònóny – òcenia Miejskô Radzëzna. Wiãkszim  dzélã głosów ùdzela bùrméstrowi absolutorium.

To béł m.jin. rok aktiwizacje jinwesticjowich remów – pòdrechòwùje Michôł Paseczny. Jak pòdczorchiwô bùrméster – jinwesticjowé wëdatczi òsągnãłë latos rekòrdową rówiznã – 30 mln zł. Dochòdë w Rëmi wëkònano na rówznie stu dwùch procent – bëłë ò 3 mln zł wiãksze nigle zakładané 233 mln zł. Mimò tegò wëkònano 90% założeniów. Przesëniãto dzél zadaniów na nen rok pòwòdu rosnącëch wcyg finansowëch òbcążeniów samòrządzënë. Zadłużenié Rëmi łoni wëniosło co le mało 32 ml zł. Co stanowi 13,7% òglowégò dochòdu miasta.

Na wieżë nôstarszi swiątnicë Lãbòrga pòwstaje widokòwi pùnkt.

Miejskô samòrządzëna przëkaza na ten cél 111 tës zł parafie p.w. swiãtégò Jakùba Apòsztoła. To dëtczi na kònserwatorszczé robòtë kònstrukcje i scanów wieżë a téż mòntaż jinstalacje i procëmògniowëch zabezpieczeniów. Na terô òstałë ju zamòntowóné drzewiané tarpë. Renowacjowé robòtë bëłë téż prowadzoné kòl kòscelnégò zwònu, zégra a téż bùtdowëch dwiérzów. Termin zakòńczeniô robòtów je naznaczony na kùńc tegò rokù. Cawny kòszt robòtów w zabëtkòwim Sanktuarium sw. Jakùba Apòsztoła wëniese wicy 900 tës zł. Na remònt i ùprzestãpnienié ji turistama zwëskano ùnijné ùdëtkòwanié w òbramienim projechtu “Skarby Lęborka”. Pòkrëje òno 60% kòsztów. Pò przekazanim 111-u mln zł bez miejską samòrządzënã, gwësny wkłôd parafie wëniese wicy 250 tës zł.

Internetowi test a nôdgrodë dlô sto nôlepszëch ùczãstników – hewò tak wëzdrzi latos kònkùrs ò bezpieczny robòce na gbùrstwie.

To jedno z prewencjowëch dzejaniów Kasë Gbùrsczégò Społecznégò Ùbezpieczeniô dlô sprawë zmiejszaniégò wëpôdków kòl robòtë. Sygnie zarejestrowac sã na starnie bezpieczenstwo.krus.gov.pl i wëfùlowac fòlmùlôr. Na pòdónô mailowô adresa òstónie wësłóny aktiwacjowi pòwrózk. W kònkùrsu je 20 pitaniów, na jaczi nót jak nôchùtczi dac òdpòwiesc. Nôdgrodë dlô sto nôlepszich ùczãstników są zachãtą do przëbaczeniô sobie reglów bezpieczny robòtë na gbùrstwie a kòl chòwë. – Gôdô direchtor pòmòrsczégò partu KRUS Môrcën Drewa. Òglowòpòlsczi testowi kònkùrs z zakresu bezpieczny robòtë na gbùrstwie prowadzony mdze do 14 séwnika. Sczérowóny je do dozdrzeniałëch personów ùbezpieczonëch w KRUS-u. Zajinteresowónëch òdsélajã do internetowi starnë.

W sobòtã òdbãdze sã 7. Bieg na Złotą Górã z cządy Kaszëbë Biegają.

Z stanitarnëch leżnoscë miónczi nie mdą òdbiwałë sã w Centrum Sportów Wodnych na Złoti Górze, leno w miesce Kartuzë. Biegacze mdą riwalizowelë na dwùch distansach, 5 a 10 czilometrów, zôs na lubòtników Nordic Walking żdaje piãc czilometrowô trasa. Sztart ùplacowaiono kòl Ławczi Asesora, zôs baza miónków mdze na terenie Kartësczégò Ceńtrum Kùlturë. Zapisac mòże sã téż w dniu rozegracje. Òrganizatorowie Biegù na Złotą Górã przëbôcziwają ò sanitarnëch òbòstrzeniach – larwë mùszi miec w biurze miónków, na sztarce i mecie, a téż wszãdze tam, dze ni ma bezpieczégò òdstãpù.