Klëka 2019.03.20 (csb)

• W szkòle w Przëwidzu Dzéń Jednotë fejrowa całô gmina.
• Frãcëskô kòmédiô dlô wejrowsczégò hospicjum – mdze òdegrónô przez znóné môlowé personë.
• W piątk we Gduńskù, a w sobòtã w Rzucewie – bądze promòwónô pùblikacjô ò archeòlogicznëch nalézëszczach w gminie Pùck.

STRZODA, 20 marca

• Fejrowanié Dnia Jednotë Kaszëbów w szkòle w Przëwidzu – miałë òsoblëwi charaktér.

Szkòłë z całi gminë rëchtowałë artistné programë i ùczniacë wielno przëszlë cobë wëfùlowac aùlã placówczi m. Eùropejsczi Unie. Zaczãlë òd òdspiéwaaniô himnu Zemia Rodnô, cobë pózni przeńc do spiéwnëch i tuńcowëch wëstãpów rëchtowónëch przez szkòłë z Przëwidza, Pòmlewa, Trzepòwa, Nowi Przëwidzczi Wsë i Kôlbùdów. To je piątô edicjô, nasz plan to bëło jednoczenié ùczniaków z całi gminë w pòspólnym fejrowanim – pòdsztrichiwô direchtórka Spòdlëczny Szkòłë m. Eùropejsczi Unie w Przëwidzu Katarzëna Sprusyk-Olszewskô. Przërëchtowanié òbjimało nié le ùczbã chòreògrafie czë tekstu, le téż robòtã przë plasticznëch dokazach, co trôfiałë na kònkùrsë – klarëje szkólnô Marta Wôłdoch, òrganizatórka swiãta. Tradicjowò i mòderno bëło całi czas. Uczniacë sã ùczëlë i grac na bréntopie i trenowelë dzysdniowi zort bùczczi – kaszëbsczégò nôrodnégò spòrtu. Gminowé fejrowanié Dnia Jednotë Kaszëbów w szkòle w Przëwidzu zòrganizowelë piąti rôz. Nimò, że swiãto je ju za nama, fejrowanié sã nie kùńczi – w sobòtã w Żukòwie na próbã bicô rekòrdu w równoczasnym granim na akòrdionie rôczi Kaszëbskò-Pòmòrsczé Zrzeszenié, a Kaszëbskô Jednota wespół z Akademią Cassubian zachãcywają do ùdzélu w turnierze bùczczi w Bólszewie.

• Mieszczanin szlachcicem – to je farwnô mòlierowa kòmédiô, jaką jinscenizëją we Wejrowie.

Pieńdze z bilietów i zbiérczi na szpëtôklu pùdą na wëpòsażenié Domôcégò Hospicjum pw sw. Judë Tadeùsza. Takô fòrma pòmòcë to nie je nowina, më wiedno mómë starã wëbrac tekst, co rozbawi pùblëcznosc – gôda na naji antenie reżisérka przedstôwkù, Éwelina Magdżarczik-Plebank. Aktorowie, co òbleką historiczné kòstiumë i sã wcelą w role mòlierowsczi kòmédie to mdą lëdze znóny z pùblëcznégò żëcô. Strzód nich radny Jack Gafka i Rafôł Szlôsa, gazétnicë Tomôsz Smùga i Mieszkò Weltrowsczi a téż nasz redakcjowi kòléga Adóm Hébel. Premiéra mdze pò Jastrach, a dzãka wiôldżémù zajinteresowaniémù jaczé w òstatnëch latach bëło widzec, w planach je wicy jak jeden wëstãp.

• W piątk we Gduńskù, a w sobòtã w Rzucewie – bãdze promòwónô pùblikacjô ò archeòlogicznëch nalézëszczach w gminie Pùck.

Ksążkã „Zespół osadniczy z epoki kamienia” pòd redakcją Danutë Król wëdało Archeòlogiczné Mùzeùm we Gduńskù. To je òbrobienié badérowaniów archeòlogów prowadzonëch òd sto lat we wsë kòle Pùcczégò WIkù. Pùblikacjô pòwsta m. jin. przë dëtkòwim wespiarcym gminë Pùck. – Traktëje ò najëch skarbach – gôdô wójt Tadeùsz Pùszkarczuk. Pùblikacjô ò Rzucewie w cządze kamienia mdze promòwónô 22 marca we Gduńskù, a dzéń pózni w rzucewsczim Kùlturowim Parkù. Tam mdze gôdóné m. jin. ò neòliticznym òsadnictwie i analize zabëtków z jantaru, krzemienia i kamienia. Wójt Pùszkarczuk rôczi òsoblëwie do ùdzélu w sobòtnym pòtkanim w Rzucewie. Promòcjô we Gduńskù mdze 22 marca ò 12:00 w Dodomù Przirodników przë sztrase Mariacczi. W Rzucewie pòtkanié mdze w sobòtã ò 11:00.