Klëka 2019.03.29 (csb)

• W Redze całi april mòże zgłaszac projechtë do òbëwatélsczégò bùdżetu
• 3 szôłtësów z gminë Przedkòwò wëprzédnionëch na òglowòpòlsczim Dniu Szôłtësa
• W Czôrny Dąbrówce w bëtowscim krézu òni żdżą za zgłoszeniama do jastrowégò kònkùrsu

PIĄTK, 29-ti marca

W Redze całi april dérëje nabiér wniosków do czwiôrtégò Obëwatélsczégò Bùdżetu. Z gardowi kasë delë do pòzeleniô 375 tës zł. Kòszt zgłosziwónëch jinwesticjów bë ni miôł przekroczëc 75 tës zł. Kòżdi bédënk mùszi pòprzéc 15 mieszkańców gardu przez złożenié pòdpisu pòd wnioskã.
W Obëwatélsczim Bùdżece Rédë mòże wzyc ùdzél kòżdi mieszkańc gardu wicy jak 16 lat stôri. Projechtë to mdze mógł całi april składac – dëcht jak w Pùckù i Wejrowie.

3 szôłtësów z gminë Przedkòwò sã nalazło strzód sto wëprzédnionëch z całi Pòlsczi. Pòdzãczi òni òdebreelë na òglowòpòlsczim fejrowanim Dnia Szôłtësa w Łowiczu. Premiéra Matéùsz Mòrawiecczi wëprzédnił „wszëtczich, co na pòlsczi wsë dbadzą ò tradicjã, le téż ò terôczasnosc i rozwij w przińdnoce”. Jak gôdô wójt Przedkòwa Andrzéj Wërzëkòwsczi – szôłtësóm sã słëchô pòdzãka za robòtã na rzecz môlowi spòlëznë.
W gminie Przedkòwò je 15 szôłtësów. Oprócz Tadéùsza Kąkòla z Pòmieczëna wëprzédnienié dostelë téż Waldémar Dãpc z Hopów i Alojz Bëczkòwsczi z Przedkòwa.

W Czôrny Dąbrówce w bëtowsczim krézu òni ju mëszlą ò nadchôdającëch swiãtach. Gminowé Centrum Kùlturë i Biblotéka rôczą do ùdzélu w kònkùrsu na nôpiãkniészą jastrową palmã. Zgłoszenia są przëjimóné do nôblëższégò czwiôrtkù do 15:00. Palmë mùszi przërëchtowac samémù, bë ni miałë òdbiégac òd òglowò przëjãtëch sztandardów. Taksowóné mdą 13 aprila na II Krézowi Prezentacje Jastrowëch Stołów. – To je rozegracjô jaką më pòdezdrzëlë na drëdżim kùńcu Pòlsczi i ùdbelë jistną zrobic kòl naju – gôdô wójt Czôrny Dąbrówczi Jón Klôsa.
Przewidzelë kònkùrs na aranżacjã jastrowégò stołu i nôlepszégò mazurka. Sczerowóny je do KGW, òrganizacjów, familiów i dodomów kùlturë. Rôczą téż pasjonatów, co  bë sã chcelë pòchwalëc swòjima ùdbama na jastrowé smaczczi.

Dëchòwò sã na Wiôlgą Noc przërëchtowac – mòże pòmòc pòtkanié w mùzeùm we Wejrowie. 12 aprila mdze promòcjô zbiérkù pasjowëch rozmëszlënków pt. „Miłota ùkrziżowónô”.
Jegò aùtórka to je dr Ludmiła Mòdzelewskô. Pòtkanié mdze zarô pò Kaszëbsczi Krziżewi Drodze na Wejrowsczi Kalwari. Mszô w parafialnym kòscele sw. Anë mdze òdprawionô ò 3:00 pp. Pòtkanié w sedzbie Mùzeùm Kaszëbskò-Pòmòrsczi Pismieniznë i Mùzyczi zaplanowelë na 6:00. Ta placówka òrganizëje to 12 aprila wespół z Ojcama Frãcyszkanérama – Pasyjno-Marijnym Sanktuarium we Wejrowie.