STRZODA, 8 JANUARA | KLËKA 08.01.2020
Maciej Bandur 8 stycznia 2020
260 sztëk lëdzy mô nalazłé nowé chëcze dzãka òsłonowémù programòwi Gdinie dlô mieszkańców „Pekinu” | W Lãbòrgù w sobòtã to dô I Pòmòrsczi Przezérk Kaszëbsczich Kòlãd ë Pastorałków | W Lëzënie w sobòtã mdą drëdżé Mésterstwa Swiata w Bùczce
STRZODA, 8 januara
260 sztëk lëdzy mô nalazłé nowé chëcze dzãka òsłonowémù programòwi Gdinie dlô mieszkańców „Pekinu”
Òb dwa i pół rokù dzãka wspiarcémù miasta wikszosc familiów wëcygnã z Grzëpë Orlicz – Dreszera, to znaczi pòpùlarnégò Pekinu. W Gdini pòdrechòwelë realizacją òsłonowégò programù. Jidze ò òsedlé, jaczé „na dzëwò” zabùdowelë robòtnicë, chtërny w 20-tëch latach zeszłégò stalecô bùdowelë pòrt ë Gdiniã. Teren béł priwatny ë tôczel sã zrobił, czej erbòwie ùdbalë so gò przedac. Miasto zabédowało mieszkającym tam familëjóm wspiarcé w nalézenim nowégò lokùm, w tim dopłatã do najimaniô mieszkaniów. Z Pekinu mają wëcygnioné 260 z kòl 300 mieszkającëch tam lëdzy. – To 128 ze 145 familiów – gôdô wiceprezydeńt Gdinie Michôł Guć. Zzagwësniôł Môrcën Kòwalewsczi, czerëjący Ceńtrum Rejintegracje ë Jinterwencje Miesczégò Òstrzódka Spòlewi Pòmòcë w Gdini. 26 familiów mdą òbjãté bezterminowim wspiarcym – przez stón zdrowiô abò wiek.
W Lãbòrgù w sobòtã to dô I Pòmòrsczi Przezérk Kaszëbsczich Kòlãd ë Pastorałków
W Lãbòrgù mdą kòlãdowelë pò kaszëbskù. W nôblëższą sobòtã mdze tam I Pòmòrsczi Przezérk Kaszëbsczich Kòlãd ë Pastorałków miona Frãca Òkùnia. Wëstąpią 17 wëkònôwców z całëch Kaszëb – midzë jinyma z Parchòwa, Słëpska, Żukòwa, Nôdolô, Wiôldżi Wsë ë, to je wiedzec, Lãbòrga. Kòżden zaprezeńtëje w Rodny Mòwie 3 sztëczczi. Gòscynno wëstąpi téż ùkrajińsczé karno Switanok. W òrganyzacji przezérkù lãbòrsczé ferejnë ë jinstitucje mô wspiarté Mùzeùm Kaszëbskò-Pòmòrsczi Pismieniznë ë Mùzyczi we Wejrowie. Gôdô jegò derektór Tomôsz Fópka. I Pòmòrsczi Przezérk Kaszëbsczich Kòlãd ë Pastorałków miona Frãca Òkùnia mdze w sobòtã ò 11:00 w Sanktuarium sw. Jakùba Apòsztla w Lãbòrgù. Na finale mdze téż rozdrzészony I Òglowòpòlsczi Kònkùrs Kómpòzytorsczi na kaszëbską kòlãdã.
W Lëzënie w sobòtã mdą drëdżé Mésterstwa Swiata w Bùczce
Kòżden mòże wzyc ùdzél w drëdżich Halowëch Mésterstwach Swiata w Bùczce – czej le pòzbierze karno 6 sztëk lëdzy. Miónczi mdą w sobòtã w Lëzënie. Bùczka sztamùje ze zabawë znóny w 19-tim stalecym, ja nazéwónô nôrodną discyplëną Kaszëbów. W Lëzënie mdą riwalizowałë karna, jaczé trenëją nen spòrt na co dzéń ë niefòrmalné karna. Sygnie pòzebrac 6 òsób, w tim 3 rezerwistów. Numer móbilczi do rejistracje karen jidze nalezc miedzë jinyma na jinternetowi stronie Gminnégò Òstrzódka Spòrtu, Rekreacje ë Turisticzi w Lëzënie. Zgłoszenia mdą przëjimóné téż w dniu turnéra, to je 11 januara. Drëdżé Halowé Mésterstwa Swiata w Bùczce sã zaczną ò 08:00 w hali w Lëzënie.
