Klëka 2019.03.25 (csb)

• W jednoce je mòc – w Żukòwie ùtczëlë swiãto co przëbôcziwô ò naji dłudżi historie.
• Radia Kaszëbë ju mòże słëchac w Bëtowie i òkòlim.
• Zwënéga karna w kanadijsczich rozgriwkach w karlingù.

PONIEDZÔŁK, 25 marca

• Fejrowanié Dnia Jednotë Kaszëbów mô parłãczëc a nié dzelëc – pòdsztrichiwelë na fejrowanim Dnia Jednotë w Żukòwie.

Grelë w baszkã, spiéwelë, béł kermasz rãkòdzeła. Nie ùdało sã pòbic rekòrdu w równoczasnym granim na akòrdionie, co nie przeszkôdzało we fejrowanim. Mają to ùstanowioné na wdôr pierszi nadczidczi ò Kaszëbach. Mô przëbôcziwac ò naji bòkadny historie, temù na ùroczëznach nôwôżniészô bëła jednota. Nôbarżi w tak zasłëżonym placu dlô naji historie jak Żukòwò – pòdsztrichiwelë zéńdzony. Zrzeszeniowé fejrowanié w Żukòwie to bëło slédné z latosëch wëdarzeniów zrzeszonëch z fejrowanim Dnia Jednotë. Relacjã przërëchtowôł Gracjón Fópka.

• Radia Kaszëbë to ju mòże słëchac – w Bëtowie i òkòlim.

Më tam zaczãlë nadôwanié na czãstotlëwòscach 104,5. Terô jesz ni ma fùl mòcë. To je nasza szóstô czãstotlëwòsc. Oprócz Udorpiô më téż nadôwómë z Rekòwa, Chwaszczëna, Kòscérznë, Hélu i Lãbòrga. Nasza stara ò nadôwanié dlô mieszkańców bëtowsczi zemi wespiérelë tamtészi samòrządarze – przez wësłanié lëstu pòpiarcô do Krajewi Radzëznë Radiofònie i Telewizje. Zapitóny przez naju mieszkańcowie Bëtowa żdżą za mòżlëwòtą słëchaniô aùdicjów w kaszëbsczim jãzëkù i môlowëch beszitów. Z nadajnika w Udorpiu na czãstotlëwòscë 104,5 MHZ naju mdze czëc nié le w samim Bëtowie le w całim krézu – gôdô nasz radiowi technik Dominik Lewicczi. Przez pierszé czile miesądzy przez prawné wëmôgania më mdzemë nadôwelë z òbniżoną mòcą.

• Kaszëbsczé Grifë dobëłë w turnierze – Nations Cup w karlingù.

Ta richtich kanadijskô zëmòwô discyplëna sã ceszi zajinteresowanim kaszëbsczi diaspòrë, chtërna kòżdi rok wëstôwiô swòjã reprezentacjã na miónczi. O titel méstra biôtkòwelë procëm Pòlôchóm, Chòrwatóm, Wendóm, Francëzóm, Jirlandczikóm i Szkòtóm. Srzód karnów nôlepszi sã òkôzelë bëc Kashubian Griffins. Jak gôdô tamtészi dzejôrz David Shulist, spòrt to je fòrma tczë dóny swòjémù nôrodowi. Pòsobné spòrtowé emòcje żdżą naszińców w Kanadze ju w nôblëższi wikeńd, czej na lodowi tôflë staną hòkejiscë Kashubian Griffins.

Foto: Gmina Żukowo