Klëka 2019.04.02 (CSB)

• W gminie Czôrnô Dąbrówka òdnowią òczëszczalniã sceków

Oczëszczalniô sceków w Czôrny Dąbrówce w bëtowsczim krézu mdze òdnowionô. Obiekt je pòstawiony w 1997 rokù i ju sã stôri robi. Gmina ùdbała pòstawic nowi sterowny sprzãt zwikszi téż przepùstowòsc òczëszczalnie. Jak gôdô wójt Czôrny Dąbrówczi Jón Klôsa – wnet całô gmina je ju skarnôlizowónô, terô czas na ùprawienié wëdajnoscë. Terôzka robią specyfikacjã jinwesticje.

Za mòdernizacjã òczëszczalnie w gminie Czôrnô Dąbrówka to przińdze kòle 7 mln zł. Robòta mdze dérowa nôblëższé dwa lata.

• Swiatowi Dzéń Aùtizmù przez tidzéń fejrowóny w Lãbòrgù

Wspòmaganié i edukacjô lëdzy z aùtizmã to piątkòwô téma rozmòwë starszich i szkólnëch ze szpecjalistama w Lãbòrgù.  To je part lãbòrsczégò fejrowaniô Swiatowégò Dnia Swiądë Aùtizmù.

Organizatór to je Stowôra Mòdri Skôrb. – Më dërch ajn cu pòdsztrichiwómë, że aùtizm nie przesztrichiwô mòżlëwòtów rozwiju lëdzy co mają to zabùrzenié – gôda w aùdicje Dobri Dzéń Kaszëbë przédniczka stowôrë Agnes Pùjsza-Pòmòrskô.

Dzél lãbòrsczégò swiãtowaniô Swiatowégò Dnia Swiądë Aùtizmù mdze witro bezpłatny pòkôzk dokùmeńtalnégò filmù „Portrety Emocji” w kinie Fregata. Za to w piątk bądze kònferencjô czerowónô do starszich i szkólnëch.

Kònferencjô mdze 5 aprila ò 12:00 w aùdiowizualny zalë Karna Mechaniczno-Jinfòrmaticznëch Szkòłów w Lãbòrgù. Finał to mdze sobòtny Marsz dlô Aùtizmù. Mòdri kòrowód rëgnie ò 5:00 pp spòd galerie przë Stôromiejsczi.

• W gminie Żukòwò òni przëjimają wniosczi ò dotacje na kònzerwacjã

W gminie Żukòwò do 12 aprila to mòże składac wniosczi ò dëtkòwé wespiarcé na mòdernizacjã zabëtków. Samòrząd planëje dac na to 200 tës zł. Dotacjô jidze na kònzerwatorską i restaùracjową robòtã i bùdowlané dzejania przë zabëtkach wpisónëch do registru zabëtków gminë Żukòwò. Colemało wespiarcé idze do parafiów na remòńtë kòscołów – gôdô bùrméster Wòjcech Kankòwsczi.

Wniosczi òni przëjimają we fòrmie papiórowégò fòrmùlara z doparłãcznikama do 12 aprila w Urzãdze Gminë w Żukòwie.