Klëka 2019.04.08 (CSB)
Adam Hebel 8 kwietnia 2019
- Utwórcowie kaszëbsczégò Shreka znôwù sã pòtkelë na Remùsowi Karze.
- KGW ze Strzépcza nôpiãkni òbzdobiło stół na ósmim Lëzyńsczim Przezérkù „Jastrë na Kaszëbach”.
- Grégór Kùjawsczi i Maria Môj-Roksz dobiwcama 11. Piôsznicczégò Biégù.
PONIEDZÔŁK, 8 aprila
- Utwórcowie kaszëbsczégò Shreka znôwù sã pòtkelë na Remùsowi Karze
Pòznôwelë nordã i sztudérów z karna Pòmòraniô. Wnet 40 ùczniaków strzédnëch szkòłów bëło na warkòwniach Remùsowa Kara. Pòmòrańcowie òrganizëją wëjazdowé pòtkania kòżdi rok, cobë zajinspirowac młodëch i przedstawic jima kùlturã Kaszëb w mòdernym wëdôwkù. Oprócz wanogów pò nordze to dało téż m. jin. jãzëkòwé i lëteracczé warkòwnie w Pùckù. Brzôd łońsczi Remùsowi Karë to béł dubbing do Shreka zmòńtowóny przez ùczniaków z ZSP Przedòwò. Filmik òpùblikòwelë w jinternece, dze òn sã dożdôł wnet 400 tës wëswietleniów.
- KGW ze Strzépcza nôpiãkni òbzdobiło stół na ósmim Lëzyńsczim Przezérkù „Jastrë na Kaszëbach”
Odswiãtno bëło w tã niedzelã w Lëzënie na ósmëch tôrgach „Jastrë na Kaszëbach”. To dało kermasz le téż kònkùrsë. Nôpiãknészą palmã zrobiła Stowôra Gòspòdëniów, Gòspòdarzów i Lubińców wsë Robôkòwò. Nôsnôżniészé malowóné jaje i kòszik ze swiãconką zrëchtowało KGW z Kãbłowa. W kategòrie „jastrowi stół” bezkònkùrencyjné bëło KGW Strzépcz. W Lëzënie rozrzeszëlë téż kùlinarny kònkùrs „Smaczno i traicjowò na kaszëbsczi drodze” Dobëła stowôra KGW Kòwalewò „Sami Swoi” za piers z kaczczi ze żurawiną òtuloną klóskama.
- Grégór Kùjawsczi i Maria Môj-Roksz dobiwcama 11. Piôsznicczégò Biégù
Biegã spòd Piôsznicczi Brómë ùczestnilë pamiãc pòmòrdowónëch w piôsznicczich lasach. Miemcë tam zrobilë pierszé masowé lëdobójstwò z II Swiatowi Wòjnie. Oprócz òddaniô tczë 11-ti Piôsznicczi Biég na 10 km to téż spòrtowô riwalizacjô w szesc wiekòwëch kategòriach. W kategòrie OPEN nôlepszi bëlë: Grégór Kùjawsczi i Maria Môj-Roksz. W gminie Wejrowò ùroczëzna na tczã òfiarów òd 7 lat mô fòrmã Piôsznicczich Dniów. Przédnym ùroczëznóm pòd Sztaturą w Piôsznicë towarzą biédżi, kòłowé i piechtné rôjdë ë kònkùrs wiédzë dlô młodëch.
