KLËKA 21.05.2019 | WTÓRK , 21 MAJA

Kaszëbskô etnofilologijô wrôcô na Gduńsczi Ùnywersytet – ale dërch z limitã 25 kandidatów | W Pùckù zrobilë bekańt ò 10 projektach zakwalifikòwónëch do welowaniô w Òbëwatelsczim Bùdżece | Na 11 Kaszëbską Paraòlimpiadã w Lëzënie je mòżno sã zapisowac do 30. maja

WTÓRK 21 maja

Kaszëbskô etnofilologijô wrôcô na Gduńsczi Ùnywersytet – ale dërch z limitã 25 kandidatów

Za niecałi miesąc régnie nabiér na kaszëbską etnofilologiją. Ten arcëwôżny dlô Kaszëbów czerënk wrôcô na Gduńsczi Ùnywersytet. Dërch to dô jednak limit chãtnëch, jaczi je prziczëną zawiészeniô nabiéru na rok. Òd nowégò akademicczégò rokù kaszëbskô etnofilologijô mdze sparłãczonô z pòlską filologiją. „Móże rzec, że są to dwa czerënczi w jednym” – podsztrichùje prodzekónka do sztudencczich sprôw filologicznégò wëdzélu dr Ewelina Gutowskô-Kozielskô. Procëm rëchlészim zapòwiescóm, limit kandidatów nie je czësto zniosłi. Cobë czerënk régnął, mùszi sã zgłosëc minymum 25 chãtnëch. Jinternetowô rekrutacyjnô systema rëszi 17 swiãtojańsczégò/czerwińca. Rejestracëjô pòtrëwô do 25. lipca.

W Pùckù zrobilë bekańt ò 10 projektach zakwalifikòwónëch do welowaniô w Òbëwatelsczim Bùdżece

Na 10 projektów mdą w zeptembrze welowelë mieszkańcë Pùcka. Je tam fardich werifikacëjô wniósków złożonëch we czwiôrti edicëji Òbëwatelsczégò Bùdżetu. Fòrmùlarze bëłë sprôwdzoné miedzë jinëmi wedle prawnëch ë technicznëch mòżnotów realizowaniô jinwesticyj ë jich realnëch kòsztów. Wôrtnosc bédowónégò zadaniô ni mògła bë wikszô jak 95 tës. zł. Nôkrocy ti grańcë bëłë projektë: Rodzynnô przistań – plac zabôw w Ôpim Gaju, wënowienié chòdnika kòl sztrasë Reja ë Zelonô klasa kòl Gruńtowny Szkòłë miona Mariusza Zarusczégò. Werifikacëją mają przeńdzoné téż ùdbë na wëbiedżi dlô psów, wëpòsażenié miasta w łôwczi ë wiatë dlô kòłów. Fùl spiska je òpùblikòwónô w jinternetowim serwisu miesczégò samòrządu. W Pùckù do pòdzélu w Òbëwatelsczim Bùdżece je 285 tës. zł. Welowanié pòdurëje òd 9. do 23. zeptembra.

„Odjazdowy Bibliotekarz” téż w Gdinie

W tã sobòtã włączą sã tam w òglowòpòlską akcëją. Mô òna jintegrowac czëtarzi z biblotékarzama ë promòwac czëtanié a téż kùlturalné aktiwnoscë bibloték. Temù są zaplanowóné kòłowé rajdë z atrakcëjama na mece. Pòspólny przejôzd przez Gdinã sã nacznie pòd sedzbą Biblotéczi z Pasją – to znaczi pòd bùdinkã 1A Pòmòrsczégò Nôùkòwò-Technologicznégò Parkù. Zbiérka ò 10:30.

Na 11 Kaszëbską Paraòlimpiadã w Lëzënie je mòżno sã zapisowac do 30. maja

Móże sã jesz zapisowac na 11. Kaszëbską Paraòlimpiadã w Lëzënie. To nôwikszé na Kaszëbach spòrtowé wëdarzenié dlô niefùlsprôwnëch mdze 9. swiãtojańsczégò/czerwińca. Zapisë są przëjimóné do 30. maja. W paraòlimpiadze mają swój dzél dzecë ë młodzeżô. Òrganyzatorã je Jintegracyjnô Swietlëca „Skrzydła Anioła”, a partnerama Gmina Lëzëno, Wejrowsczi kréz ë GOSRiT w Lëzënie. Zapisë są przëjimóné przez telefón òd pòniedzôłkù do piątkù w gòdzënach òd 08:00 reno do 04:00 òd pôłnia. Numer Wa nalézeta na jinternetowi stronie Gminnégò Òstrzódka Spòrtu Rekracëji ë Turisticzi w Lëzënie ë Jintegracyjny Swietlëcë „Skrzydła Anioła”.