KLËKA 17.04.2019 (CSB)
Adóm Hébel 17 kwietnia 2019
- W nôblëższich dniach w gminie Serakòjce sã zacznie rozbùdowa gazocygù.
- Frãcyszkanérowie z Gdinie rôczą na jastrowi frisztëk dlô samòtnëch i brëkùjącëch pòmòcë.
- Kwiatë z bibùłë zôs są w módze. Techniczi jich pleceniô przëbôcziwają w Kòscérznie.
STRZODA, 17 aprila
- Rozbùdowa gazocygù sã zacznie w gmimie Serakòjce
Gmina Serakòjce sã dożdże bùdowë gazocygù. W nôblëższich dniach sã zacznie realizacjô jinwesticje, za jaką òdpòwiôdô spółka PGNiG Gazoprojecht. Terôzka przekazywają place bùdowë, na jaczich bądze robiło pôrã ekipów narôz, gôdô zôstãpca wójta gminë Serakòjce, Zbigórz Fùlarczik. Na zôczątkù séc pòwstónie w Serakòjcach z rozùdową w môlëznach Mëdżi i Gòwidlëno, to je w stronã Lãbòrga, do gromadë 40 km gazocygù. Më liczimë na to, że mieszkańcowie rôd sã mdą przëłącziwelë do sécë, to nama pòzwòli ze smògã biôtkòwac.
Jinwesticjô mdze dónô do ùżëtkù pòd kùńc rokù.
- Frãcyszkanérowie z Gdinie rôczą na jastrowi frisztëk dlô samòtnëch i brëkùjącëch pòmòcë
Samòtny i brëkùjący pòmòcë gdinianowie pòsobny rôz sã pòtkają przë jastrowim stole kòl òjców Frãcyszkanérów. W niedzélny pòrénk bądą za nima żdelë wòluntérowie, prezydeńt Gdinie i jastrowé môltëchë, gôdô Bòżéna Zglińskô z Ceńtrum Aktiwnoscë Seniora. Wiedno wicy lëdzy sã zgłosziwô do naju cobë pòmòc w òrganizacje frisztëkù, to nié leno harcerzowie, parafialné karno Caritas, prezydeńt i radny, gôdô Pioter Matuszôk, gwardión klôsztoru frãcyszkanérów w Gdinie. Uroczësti jastrowi frisztëk w Gdinie zaplanowelë na niedzelã 21 aprila ò 8:00 reno w dólnym kòscele òjców Frãcyszkanérów.
- Kwiatë z bibùłë zôs są w módze. Techniczi jich pleceniô przëbôcziwają w Kòscérznie
W Kòscérznie przëwrócywają do żëcô stôri zwëk robieniô kwiatów z bibùłë. Przódë taczima kwiatama strojilë kapelczi i pannë młodé. Lata minãłë i tradicjô wnet czësto ùmarła. Terô zwëk wskrzesziwô Kaszëbsczi Jinstitut Rozwiju, co dobéł na ten cél ùdëtkòwienié. Przewidzelë 120 gòdzënów zajmów, pierszé ju bëłë, le całi czas to mòże sã zapisac. Zajmë prowadzy Bògùmiła Bednark, co warkòwò twòrzenim kwiatów z bibùłë sã zajimô ju 10 lat. Terô prowadzy Kaszëbską Edukacjową Galeriã.
