Klëka 2019.03.27 (csb)

• To ju mòże zgłaszac kańdidatów do kaszëbsczi lëteracczi nôdgrodë.
• Tësąc złotëch kòżdi rok mògą dostawac stolatkòwie w gminie Żukòwò.
• Bytovia Bëtowò biôtkùje w pierszi lidze i dërch szukô za titularnym dobrzińcą.

STRZODA, 27 marca

• Ju drëdżi rôz Mùzeùm Kaszëbskò-Pòmòrsczi Pismieniznë i Mùzyczi rôczi do zgłosziwaniô kańdidatów – do Kaszëbsczi Lëteracczi Nôdgrodë.

Ona mdze dónô wëbróny przez kapitułã òsobie na galë wespół z Pòmòrską Nôdgrodą „Wiater òd mòrza”. Wicy rzecze Adóm Hébel.

• Tësąc zł dlô kòżdégò chto skùńcził setny rok żëcô – taczi geszënk szëkùje dlô długòwiecznëch gmina Żukòwò.

Stolatkòwie mają dostawac gratifikacjã kòżdi rok. W ùdbie samòrządu te strzodczi mògą jic na równo jaczi cél. Jak gôdô bùrméster Żukòwa Wòjcech Kankòwsczi – to je lepszi darënk jak pierzna czë kòc. Cobë dostac wespiarcé dlô stolatnych lëdzy to mdze mùszôł złożëc wniosk. „Bon 100” nie zabierze wiele z gminowégò bùdżetu. W gminie Żukòwò terô żëje blós dwùch stolatków.

• Pierszoligòwô Bytovia Bëtowò dali w grze – le dërch szukô za titularnym dobrzińcą.

Tôkle z finansową płinnoscą klubù sã zaczãłë łoni, czej wespiarcé copna firma Drutex. Przedërchac sã ùdało dzãka rzniãcóm m. jin. w gażach miónkarzów. Wprowadzelë téż òpłatë za ùdzél w treningach. – Bytovia mòże prôwdac rechòwac na wespiarcé cziledzesąt môlowëch firmów – gôdô przédnik Janusz Wiczkòwsczi – le klubòwi je nót jednégò, wiôlżégò dobrzińcë, co mù pòzwòli nazôd stanąc na nodżi. Bytovia je na 13 placu w tabelë pierszi lidżi na 18 sklasyfikòwónëch karnów. Nôblëższi mecz bëtowianowie zagrają na wëjezdze – 30 marca z GKS Tychy.