Klëka 2019.04.01 (CSB)

• Mieszkańcowie Rëmi òd dzysô wicy płacą za wëwóz smiecy
• „Kaszëbsczi wanożnik pò Gduńskù” promòwelë na II Gduńsczich Tôrgach Ksążczi w Bôłtëcczi Filharmónie
• W Bëtowie dzecë i młodi sã mògą zapisywac do 13. Festiwalu Frantówczi „Wschodami Gwiazd”

PÒNIEDZÔŁK, 1-szi aprila

• Wicy za wëwóz smiecy òd dzysô płacą w Rëmi

W Rëmi òd dzysô òbòwiązywają wëższé òpłatë za wëwóz smiecy.
Za òdbiér i ùtilzacjã segregòwónëch òdpadów to mùszi zapłacëc ò 4 zł wicy – to wëchôdô 15 zł. Wiele mòcni ùrosłë òpłatë za wëwóz niesegregòwónëch smiecy – z 19 do 40 zł za òsobã. Pòdwëżka mô zachãcëc do zmianë zwëków kòl 7% rëmianów, do jesz nie segregùją òdpadów. – Do te më nie zmieniwelë òpłatów òb slédné szesc lat – gôdô prowadny Gardowi Radzëznë Ariél Sënicczi.
Wzrost kòsztów i przepisë prawa diktëją ùstalenié òpłatów tak wësok, cobë ùdëtkòwic òdbiér òdpadów i jich zagòspòdarzenié – dodôwô Ariél Sënicczi.
Rëmianowie co ùdbają zmienic swój métel zbiéraniô òdpadów mùszą złożëc pasowną deklaracjã w Urzãdze Gardu.

• „Kaszëbsczi wanożnik pò Gduńskù” promòwelë na II Gduńsczich Tôrgach Ksążczi w Bôłtëcczi Filharmónie

„Kaszëbsczi wanożnik pò Gduńskù” miôł swòjã premiérã na II Gduńsczich Tôrgach Ksążczi w Bôłtëcczi Filharmónie.
Prowadnik wëszedł smarą Kaszëbsczégò Jinstitutu. Jegò aùtorowie to są: Miłosława Bòrzëszkòwskô–Szewczik, Bògùmiła Cyrockô i profesór Cézari Obracht-Prądzyńsczi. Jak pòdsztrichiwelë na premierze „Wanożnika” – nie szło le ò historiczny przekôz, le téż cobë pòkazac wkłôd kaszëbsczi grëpë w kùlturã, spòlëznowé żëcé i juwernotã Gduńska.
Wëdanié „Kaszëbsczégò wanożnika pò Gduńskù” dëtkòwò wspòmògł gardowi samòrząd Gduńska.

• W Bëtowie dzecë i młodi sã mògą zapisywac do 13. Festiwalu Frantówczi „Wschodami Gwiazd”

W Bëtowie zaczãlë zôpisë do 13. Festiwalu Frantówczi „Wschodami Gwiazd”. To je spiéwny kònkùrs czerowóny do dzecy i młodëch. Obòwiązkòwò do repertuaru mùszi włączëc jednã frantówkã Andrzeja Rëbińsczégò, co mdze prowadnikã jury. Za zgłoszeniama më żdżemë do 19 aprila – rôczi direchtór Bëtowsczégò Ceńtrum Kùltur, Marión Gòspòdark.
Festiwal „Wschodami Gwiazd” mdze w Bëtowie 17 i 18 maja.

Zymk rôczi do aktiwnoscë bùten, temù gmina Lëniô ju prowadzy zôpisë na latosą edicjã przełajowëch biégów.
Pò terenach Kaszëbsczégò Krôjòbrazowégò Parkù pòbiegną ju 14-ti rôz. Rozegracjô przëcygô tak mieszkańców jak i lëdzy z bùtna, co przë leżnoscë chcą pòznac naje snôżé terenë – gôdô wójt gminë Lëniô Bògùsława Engelbrecht. Latos bédënk pòszérzëlë dlô lubińców marszu.

Wòjewódzczi Przełajowi Biég w gminie Lëniô mdze 14 aprila, sztart ò 12:00. Zajinteresowónëch dopisanim sã do sztartowi lëstë jô òdsélóm do stronë www.gminalinia.com.pl