PIĄTK, 11 SÉWNIKA | KLËKA 11.09.2020
Dziennikarz Radio Kaszëbë, 11 września 2020
Projecht ùstawë ò metropòlie na Pòmòrzim trafił do Sejmù. W lãbòrsczim krézu mòże dwignąc swòje kwalifikacje w darmòwich warkòwniach. Wejrowò mdze brało ùdzôl w akcje „Europejski Tydzień Zrównoważonego Transportu”.
PIĄTK, 11 séwnika
To kawel na chùtczi rozwój regionu, a òsoblëwie wsów i miasteczk. – Ùstawa metropòlitalnô dlô Pòmòrzégò òsta sczerowónô do robòtów w Sejmie.
Projecht wikszim dzélã głosów przejelë senatorowie. – Ùtwòrzenié metropòlie ùkarszni wespółrobòtã i dozwòli na bëlniszé zwëskiwanié dëtków – wskazëje wójt gminë Lëniô. Bògùsława Engelbrecht bëła w reprezentacje metropòliowégò òbszaru Gdùńsk-Gdiniô-Sopòt na welowanim w Senace. Gôdôł z nią Pioter Szëca.
W Lãbòrgù żdają za chãtnyma do ùdzôlu w warkòwniach dwigającëch kwalifikacje. Ùdzôl w nich je za darmòka.
Mòżna òstac m.jin. spawaczã, speditorã a òperatorã kòparkò-ładowarczi. Szkòlenia mdą prowadzone do kùńca przédnégò rokù w 14-stu kategòriach. – gôdô lãbòrskô staroscënô Alicjô Zajączkòwskô. Realizowanim projechtu mdą sã zajimałë przede wszëtczim krézowé szkòłë. Do ùdzôlu w warkòwniach mògą sã zgłaszac personë, jaczé mają òd 18 do 64 lat a mieszkającé na terenie lãbòrsczégò krézu. Bédënk je téż sczerowóny do absolewntów lãbòrsczich szkòłów chcącëch zmienic abò dofùlowac swòje wësztôcenié. Pierwszé warkòwnie ju są rozpòczełë a mdą warałë do kùńca maja przédnégò rokù. Krézowi ùrząd w Lãbòrgù zwëskôł na nen cél 6 mln zł, dokładającë milion. Kôrbiónczi z Alicją Zajączkòwską mòże pòsłëchac na naszi starnie www.radiokaszebe.pl.
W Wejrowie mdą zachãcywelë do przechôdzków a wëzwëskiwaniô z pùbliczny kòmùnikacje – w òbramienim Europejskiego Tygodnia Zrównoważonego Transportu.
W kampaniã angażëje sã wiele gardów, téż na Kaszëbach. Jak dôwają do wiadë w Wejrowie – “Z bôczënkù na warającé pòszëdło kòrunawirusa òdbãdze sã leno dzél latosych edukacjowich a promòcjowich dzejaniów”. Òd strzodë Miejsczi Ùrząd we Wejrowie prowadzy facebookową rozegracjã z nôdgrodama. Bãdze mòżna zrobic òdjimk, czej zwëskùje sã z jinégò jak aùtoł strzódka transpòrtu np. kòła czë banë. Òdjimk nót je wësłac w kòmentarzu. Ùsôdzcë trzech nôbëlniszëch òdjimków dobãdą nôdgrodë. Òjropejską kampaniã jak wiedno zakùńczi “Dzéń bez aùtoła”. 22 séwnika miéwcë aùtołów mdą mòglë za darmòkã jezdzëc pòjazdama wejerowszégò MZK za òkazanim rejestracjowégò dowòdu.
