KLËKA 14.05.2019 | WTÓRK, 14 maja

W Bytowskim Inkubatorze Przedsiębiorczości ùczą przińdnëch geszeftmanów | W Mechelindze zaczinają bùdowac rëbacczi skansen | W pińc sołectwach gminë Lëzëno w nôblëższą niedzelã mdze sołeckô welacëjô

WTÓRK 14 maja

W Bytowskim Inkubatorze Przedsiębiorczości ùczą przińdnëch geszeftmanów

W Bytowskim Inkubatorze Przedsiębiorczości ùczëłë sã òsobë, jaczé miałë dostóné dotacëje z Ùrzãdu Robòtë. Te sprofitowałë ze szpecjalny òfertë na Òtemkłëch Dniach Eùropejsczich Fùńduszów. Przińdny geszeftmanowie dostóną na rozpòczëcé gòspòdarczi aktiwnoscë do 23 tës. zł. Na szkòlenim w Inkubatorze wëdowiedzelë sã na przikłôd jak richtich spisowac ùmòwë ë z jaczich zdrzódeł financowaniô mògą jesz sprofitowac. Ò dëtkach na bórg mësli Łukôsz Świdersczi, chtëren òtemknie bùdacyjną firmã. Przińdny miéwcowie firm mògą téż sprofitowac z òfertë Kaszubskiego Inkubatora Przedsiębiorczości. – Òferëjemë arãda biurowëch pòmieszczeniów na trzë lata na preferencyjnëch warënkach – gôdô derektór Ãdris Chmielecczi. Dzysôdnia w Bytowskim Inkubatorze Przedsiębiorczości dzejô 7 firm. Nastãpnëch 5 arãdëje kòmercyjné pòmieszczenia.

W Mechelindze zaczinają bùdowac rëbacczi skansen

W Mechelindze zaczinô sã bùdacëjô nowégò rëmù do rekreacëje. Mô to bëc téż plac, gdze prezeńtowónô mdze historëjô rëbactwa w gminie Kòsôkòwò. Tak zwóny skansen w Mechelindze stónie òbliżą przistanie. – To nastãpnô jinwesticëjô, jakô turisticzno ùatrakcyjni ten môl – rzecze wójt Kòsôkòwa Môrcën Majek. Z historëją rëbactwa w Mechelindze mdze mógł sã zapòznac szpacérëjącë ë òdpòcziwającë kòl brzegù Pùcczégò Mòrza. Skansen w Mechelindze mô pòwstac do latnëch feriów. Mdze kòsztôł wnetka pół mëliona złotëch, z czegò pòłowa je ùnijnégò dofinancowaniô.

Miesąc pózdni jak bëło planowóné mdze kònferencëjô w Słëpskù „Film o Kaszubach”.

Termin je przełożony na 28. maja przez aprëlowi protest we wiele szkòłach. Metodiczné pòtkanié dlô szkólnëch kaszëbsczégò jãzëka òrganyzëją Kaszëbskò-Pòmòrsczé Zrzeszenié ë Jinstitut Pòlonysticzi Pòmòrsczi Akademije w Słëpskù. Na plenarnëch wëkładach mdze gôdóné ò filmach pò kaszëbskù ë ò Kaszëbach ë ò projekce Wirtualné Kaszëbë. Pioter Zatoń rozpòwié téż ò robòce przë filmie – òd ùdbë do realizacëje. Zaplanowóné są téż warkòwnie dlô szkólnëch. Mdą dedikòwóné ôrtóm gôdaniô z heroją filmòwi repòrtażë, przërëchtowaniémù scenarnika ë technicznym aspektóm realizacëje filmów. Kònferencëjô „Film o Kaszubach. Narzędzie pracy i zabawa w szkole.” mdze 28. maja w Pòmòrsczi Akademiji w Słëpskù. Zgłoszenia są przëjimóné do 24. maja na mailową adresã edukacja@kaszubi.pl.

W pińc sołectwach gminë Lëzëno w nôblëższą niedzelã mdze sołeckô welacëjô

W gminie Lëzëno w tã niedzelã wëbierzą pinc szôłtësów. Mieszkańce do ùrnów pùdą w Lëzënie, Kãbłowie, Robôkòwie, Milwinie ë Dąbrówce. Wékeńdowi termin to je rezultat wprowôdzeniô nowi fòrmùłë dobiéraniô szôłtësów. Bëło zrezygnowóné w ni z welowaniô na wiesczich zéńdzeniach. Fòrmùła dopiérze je przëjãtô w pińc sołectwach, bò dzél szôłtësów béł wëbróny ju w strëmiannym/marcu. Sołeckô welacëjô w gminie Lëzëno mdze w nôblëższą niedzelã. Welowac mdze mógł òd 08:00 reno do 04:00 òd pôłnia.